Rusiya İrana kəşfiyyat məlumatları ötürür – Kreml müharibənin uzanmasını istəyir

Rusiya İrana ABŞ hərbi obyektlərinə qarşı dəqiq zərbələr endirmək üçün kəşfiyyat məlumatları ötürür. Bu, münaqişəyə başqa bir böyük dövlətin dolayı yolla qarışdığını göstərən ilk konkret nümunədir.

Bakupost.az xəbər verir ki, “The Washington Post”un üç mənbəyə istinadən verdiyi məlumata görə, Moskva Tehranla əməkdaşlıq çərçivəsində ABŞ-ın regiondakı hərbi gəmiləri və təyyarələrinin yerlərini paylaşır. Mənbələr bu təşəbbüsü “nisbətən genişmiqyaslı” adlandırıb.

Analitiklər bildirirlər ki, İran zərbələri yüksək dəqiqliklə erkən xəbərdarlıq radarları və post-horizon radar sistemləri üzərinə yönəldilir və bu məlumatlarda Rusiyanın peyk görüntüləri mühüm rol oynayır. “Carnegie Endowment for International Peace”in eksperti Dara Massikot qeyd edir ki, İranın yalnız bir neçə hərbi peykinin olması Rusiyanın təqdim etdiyi məlumatları kritik edir.

Mənbələr bildirirlər ki, İranın münaqişə boyunca atdığı minlərlə pilotsuz uçuş aparatı (PUA) və yüzlərlə raket ABŞ hərbi mövqelərinə, səfirliklərə və mülki obyektlərə zərbə vurub. ABŞ tərəfindən keçirilən birgə əməliyyatlarda isə artıq 2000-dən çox İran hədəfi məhv edilib.

Bundan əlavə, Mərkəzi Kəşfiyyat İdarəsi (MKİ) və Pentaqon məsələ ilə bağlı şərh verməkdən imtina edib. Ağ Ev sözçüsü Anna Kelli bildirib ki, İranın ballistik raket ehtiyatı gündən-günə azalmaqdadır, dəniz qüvvələri məhv edilib və istehsal imkanları ciddi zərbə alıb.

Mənbələr bildirirlər ki, Kremlin məqsədi münaqişəni uzatmaqla həm neft gəlirlərini artırmaq, həm də ABŞ və Avropanı Ukrayna müharibəsindən yayındırmaqdır.

Analitiklər hesab edir ki, Rusiya münaqişəyə birbaşa qoşulmayıb, lakin dolayı şəkildə strateji üstünlüklər əldə etməyə çalışır. Çin isə Tehranı hərbi baxımdan dəstəkləmir, baxmayaraq ki, iki ölkə arasında yaxın əlaqələr mövcuddur.

Kəşfiyyat məlumatları İranın zərbələrinin dəqiqliyi artırır, hava müdafiə sistemlərini aşır. Rusiyanın peyk və kəşfiyyat dəstəyi İranın təxribat imkanlarını genişləndirir. ABŞ və müttəfiqləri həm də öz silah və müdafiə resurslarını tükətmək riski ilə üz-üzədir.

Cavid, BakuPost