Ru
22:27 / 24 Noyabr 2019

Jurnalistin Şuşa qeydləri: Bura mənim şəhərim, amma başımın üzərində iki-üç rus, dörd erməni...

24760
Vertolyotla Xankəndinə gələndən, burada "erməni diplomatlarının" sərsəmləməsindən canımızı qurtarandan sonra Şuşaya gedirdik.


BakuPost
musavat.com-a istinadən Nazim Sabiroğlunun yazısını təqdim edir:


Xankəndi ilə Şuşanı birləşdirən "Ağa körpüsü"nü keçəndə-"Yeddi dolama"ya çatanda hələ uşaq vaxtlarında olduğu kimi yenə ürəyim qalxdı, əlimi ağzıma sıxıb "ceep"in sürücüsünün çiynindən vurub saxlamasına işarə etdim. O da saxladı, yanımdakı iki nəfər düşmədi, qarşıda oturan bələdçi, qolunda iri hərflərlə ingiliscə ATƏT(OSCE) yazılan sarışın belarusiyalı yanıma gəldi, heç nə soruşmadan dumandan görünməz olan uca təpələrə sarı boylandı, tapançasını göstərirmiş kimi hərəkət edib uzaqlaşdı.

Buralara balaca olanda böyürtkən yığmağa gələrdik, cır və tozlu olardı deyə, evə aparmazdıq, elə yolda yeyib Ağdam-Şuşa avtobus ilə şəhərə qayıdardıq. İllərdir həsrət qaldığım havasını ciyərimə çəkdim- nəfəsim tutuldu, aramsız öskürək başladı. Maşındakılar artıq narahat olmağa başlamışdılar: bələdçi sürücüyə ratsiyanı gətirməyi tapşırdı. Rusca "bir az ləngiyirik, bir nəfərin halı pisləşib" xəbərini verdi və mənə sarı boylandı. Hava sanki dumanlı yox çirkli idi, bu dolamlar, kollar, ağaclar məni yadda saxlaya bilməzdilər, ona görə yad adam kimi baxırdılar, hətta bəlkə ağzımdan gələn təmiz sudan çimçənirdilər də. (Artıq ikinci sutka idi ki, qarşımıza qoyulan düşmən çörəyinə əl belə uzatmamışdıq, ancaq Bakıdan götürdüyümüz suyu içirdik hələ ki...)

Bu yadlıqdan gözüm yaşardı, üzümü dəsmalımla tutub silirmiş kimi maşına yaxınlaşdım, özümü ələ aldım. Yaxşi olduğumu göstərmək üçün lap köhnə kişilər kimi burada illərdir unudulan, şuşalıların adətən, uzaq yola çıxanda dedikləri "Allah, Məhəmməd, Ya Əli!" sözlərini təkrarladım. Sürücü və bələdçi "Ya Allah" eşidən kimi çönüb təəccüblə üzümə baxdılar, yanımdakı iki nəfər-azərbaycanlı jurnalistlər səhərdən ilk dəfə gülümsədilər, ikisi də "hər şey qaydasındadır" dedilər.

Daha ətrafa baxmırdım, gözlərimi yaş torpağa bulaşmış çəkmələrimə dikdim, ayaqlarım mənə çox qəribə görünürdü. Elə bil mənim deyildi, əlimlə ovuşdurub, "məni düşmən qarşısında biabır etmə" deyib sığallamasaydım, uzağa qaçacaqdılar. "Şuşa perevalını" belə keçdik...




Hə, bu da erməni tankı. Doğma bir adamı görürmüş kimi "Albertin vurduğu tank!" deyib sürücüyə saxlamağı xahiş etdim. Bələdçi "burada dayanmaq planda yoxdur" deyib əli ilə irəlini göstərdi. "Şuşanın işğalı günü burada xeyli əsgərimiz şəhid olmuşdu, çoxu hələ də itkindir" deyib yanımdakılara pıçıldadım. "Avtobaza"nın yanında sovet dövründən qalma "Pyannıy voditel pristupnik" şüarının üstünə indi ermənicə nəsə yazmışdılar. Qarşısında iki-üç nəfər dayanmışdı, yəqin ATƏT-in maşını olduğu üçün bizə sarı boylandılar. Əyinləri-başları tör-töküntülü, üzləri tüklü və çəlimsiz ermənilər siqaretlərini sümürüb darvazadan içəri girdilər. Nə biləydilər ki...

Şuşaya üst yoldan girdik, telefonlarımızı Bakıda qoyub çıxmışdıq, bel çantamızda fotoaparatdan başqa bir şey də yox idi. "Saat neçədir, əcəba" fikirləşib illərdir qoluma vurmadığım saata baxdım. Atamın saatına... Evdən çıxanda onu taxmışdım. Səfərdən 1 həftə əvvəl Bakıdakı saatsaz donquldana-dolquldana sazlamış, 20 manatımı almış, "bunu neynirsən, modası da keçib gəl sənə..." deyəndə "yadigardı" deyib sözünü ağzında qoyduğumu xatırladım.

...11-ə işləmişdi. Saatlarımız Bakı vaxtilə işləyirdi. İlk dəfə ağlıma gəldi ki, burda saat eyni zamanı göstərirmi? Bələdçidən dəqiqləşdirdim, saatlar Bakı vaxtilə işləyirdi. İdrisin "Tısbağa pavilyonu" dururdu, qarşısında iki-üç maşın dayanmışdı. Yəqin xaşa gəlmişdilər. Şuşada xaşın noyabrda ayrı ləzzəti olur axı. Qəbiristanlıq tərəfə boylandım, bələdçi də bu dəfə ingiliscə "no-no" dedi. Mirzə Həsən qəbiristanlığı...



Doğmalarımızın uyuduğu məzarlıq. Yuxarı tərəfdən də görünür, bir də oradan boylandım. Dumandan heç nə görünmürdü.

Şəhərə girdik- "Qaşqayın dükanı", "Novruzun xəngəlxanası" tərəfdən...Ermənilər yolun sağında indi hotel tikiblər, xariciləri burda qarşılayırlar. Biz də xarici imişik...Taleyə bax!

Hə, burda bizi beş-altı nəfər gözləyirdi. İngilis dilində ATƏT nümayəndəsi ilə danışdılar, nəsə kağız-kuğuza baxdılar, maşının üstündə "təhvil-təslim" sənədlərinə qol çəkdilər. "Novruzun xəngəlxanası" tərəfdən onun səsi gəldi: "Ə, bajıoğlu görünmürsən", dedi sanki. "Novruz dayı, yeməyə nə var", soruşanda ancaq bir menyunu təkrarlayırdı: "Sous, qreçka, gözləsən xəngəl..." Xəngəl indi Şuşa havasında nə gedər, nə gedər... Şuşalılar hətta ən pis günlərində də zarafatlarından qalmazdılar, amma gülmək vaxtı keçmişdi...

7 ay idi siqareti tərgitmişdim, iki gün idi artıq ikinci paçkanı çəkib qurtarırdım. Yeni siqaret paçkasını açmaq bəhanəsiylə maşından düşdüm, bütün nəzərlər üzərimə dikildi. "On?" sualına, "da, tolko on mestnıy" dediklərini aydın eşitdim. Şuşanın soyuğu iliyimə işləyirdi, niyə belə üşüdüm ki? Belimi şax saxlamağa çalışdım, iki gündə arıqlamışdım sanki, yəqin ondan üşüyürdüm. Gəlməyimə ilk dəfə bərk peşman oldum, bu mənim şəhərim, bura mənim vətənim, bura doğmalarımın məzarı olan yer, amma başımın üzərində bir ATƏT, iki-üç rus, dörd erməni...Necə qırılmayasan?

O binadakı üçüncü mərtəbədən baxan qız kimdir? Yoxsa...Orta məktəbdə ürəkdən-ürəyə "üçan" vaxtlarımızda indi durduğum yerdən bir sinif qızını burada çox gözətləmişdim...A...? Balkondakı qız əl edir. Kimə? Yəqin acıq verir bizə...

Gözlərimə bu dəfə qaranlıq çökdü, siqareti hirslə ayağımın altına atıb əzdim, sanki hirsimi bu kötükdən çıxırdım.

Bir mikroavtobus gəldi, Ermənistan nömrəsini yəqin qəsdən sökmüşdülər. Bir maşından düşüb o biri qara şüşəli maşına oturanda yalnız indi bizi salamlamaq yadlarına düşdü. Aralarında cəmi bir erməni qız vardı, beş dəqiqənin içində təqdimat oldu, bizim kimliyimizi soruşmadılar. Erməni qız bərbad rus ləhcəsi ilə "sizin bələdçiniz mən olacam, şuşalıyam" dedi. Həmkarımızın "gəlin Azərbaycan dilində danışaq" təklifinə erməni qız gülümsədi, "ya tolkom ne znayu" dedi.

Hə, Şuşa... Yazıq Şuşam! Avtovağzalı keçib, "Bazarbaşına" gəldik, erməni qızın nə dediyini artıq eşitmirdim, arada hırıldayırdı, əliylə küçələri göstərib danışırdı. Nə danışırdın axı ay yalançı erməni? Mən buraları gəzib dolananda, sumkamı sürütləyib qış-yaz dərsə gedəndə, "Güllü bulvardan" gül oğurlayanda, "Qarabağ" "qəstini"nin liftində aşağı-yuxarı gəzəndə, qızıl balıqları yemləyəndə, yay aylarında küçələrində saatlarla velosiped sürəndə, yıxılıb qolumu qıranda, Daşaltı çayında çiməndə, gəlin maşınlarının qabağını kəsəndə, gəlmə qızların arxasınca gəzəndə, gəlmə oğlanlarla dalaşanda sən hardaydın axı? Kimin qızısan? Dədən kim? Nəslin kim? Burda nə ölümünüz var?



Qara maşın Yuxarı Gövhərağa məscidinin yanında saxladı. Yeni təmir etdiriblər. Ayaqlarım yenə sözümə baxmadı. Bu tin bizim məhəllənin tini hesab oluna bilərdi. Burada hər kəs durmazdı. Öz adamları vardı məscidin qarşısının.

Maşından düşən kimi əlimi tez heç dəyişməyən məscidin qarşısındakı nəhəng daş işıq dirəklərinə qoydum. Heç kim gözümün qaraldığını, ürəyimin az qala partladığını hiss etməsin deyə söykəndim o daşa..."Buradan evimizə 200 metrlik məsafə olar" deyə yanımdakı həmkarıma dedim. O da bir mənə baxdı, bir yola... Yazığı gəldi elə bil. Əlini çiynimə qoyub, "sakit olaq, sonra deməsinlər ki..."

Yolda xeyli erməni vardı, bizə elə baxırdılar ki...Şuşa bazarına sarı çevrildim. Tək-tük adam girib-çıxırdı.

Evimizə sarı yenə boylandım. Bura kimi gəlib evimizə getməyim? Erməni qıza yaxınlaşdım, "bir az aşağıya-Bəzirov küçəsi 10-na gedə bilərik", deyə, soruşdum. Cavabı yenə rusca verdi: "Marşrut təsdiqlənib, ondan kənara çıxa bilmərik".

"Mən burda böyümüşəm, bura mənim vətənimdir, bura..." deyəndə artıq gözlərimdən yaş süzülürdü. Sonucu dəfə anamı itirəndə belə ağlamışdım. Özümü güzgüdəki kimi görürəm o cür ağlayanda. Qəzəb məni boğurdu: "Sizin hamınızın..."

(Davamı olmayacaq)

Şərhlər
  • Sadixova Afet

    goz yaslarimi tuta bilmedim,hele de hicqirib aglayiram.men Qarabagli,Susali olmasam da usaqliqda Susada olmusam,istirahete getmisik.indi oz Susamiza silah altinda,nezaretci ile getmek meni yandirdi...nece olur,ermeni Azerbaycana gelib istediyi mekana gede bilir,basinin ustunde nadzor olmur,amma bizimkiler oz torpagina gedende oz evini ziyaret etmeye icaze vermirler.bu nece qarsiliqli ziyaretdir,ermeni oz dedesinin evi kimi burda gezir,bizimkiler orda cizilmis marsrutla hereket edirler...

  • Elçin İsayev

    hirsimnən gözlərim doldu.

  • Mustafa Qedimbeyli

    Menimde gözlerim yaşardı. Ölüme bele hazıram, teki torpaqlarımızı geri qaytaraq. Bir oqlum var, torpaqlarımızın alınmasl eşqi ile yaşayır.

  • Xeyal Qurbanov

    Kovreltdin meni qardaw!

  • Seymur Tapdygov

    COX AQRILI VE TESIRLIDIR MENE COX YAXINDIR BU DERD MEN KELBECERE EVIMIZE SPUTNUKDEN BAXIRAM...! ALLAH RUSLARIN BELASINI VERSIN!!! ERMENI ISTIFADE ELEMENTIDIR!!!

  • Quliyev Vuqar

    Eziz qardawim her bir qeyretli veten ovladinin yarali yeridir Qarabag.Her qariwi her dawi her bir ciceyi bizim ucun muqeddesdir yawadiqlarini oxuyub duygulanmamaq elde deyil Allah bizim sebrimizi elimizden alsin daha ne qeder dozmeliyik?daha ne qeder gozlemeliyik axi xalq olaraq birlewib azad etmeliyik torpaqlarimizi tapdalanmiw namusumuzu qanla yumaliyiq dahi bir insan demiwken dua oxumaqla donuz daridan cixmaz...

  • Natiq Qasimov

    Oxudum mende bu hisleri yasadim cetin anlar yasamisan qonsu...... Neyse.

  • Babacan Zəkiyev

    Yeni nəsil çalışacaq ki, sizin üzüntülü göz yaşlarının sevinc göz yaşlarına çevrilsin

  • mən

    tüpürüm sənin səfərinə də şərəfinədə

  • Kişiyev Üzeyir

    Qarabağli deyiləm.Amma bu yazilanlar üçün ağladım.

  • İlham Novruzov.

    Can qardaş can. Nələr cəkdiyini hiss edirəm. Elə istərdim ki, Şuşamızdan onu sevən bir ürək sahibi kimi cox uzun yaza idin. Hamlmızın həsrət qaldığı Şuşamızdan. Şuşa alınana qədər uşaq vaxtından hər il Şuşada 1,5 -2 ay yay aylarında olmuşam Cuxur məhəllədə. Cökələrin altında o qədər futbol oynamışıq. Mahmudov Zəfər, Yavər, rəhmətlik Xosrov müəllimin oğlu Arif, Nazim müəllimlə, taksi Surxay dayının oğlanlarılə, Ləzgiyevlərin oğlanlarilə başda fotoqraf Feruz olmaqla, türmə tərəfin, Canaqqala tərəfin uşaqları ilə nələr etmirdik..... Eeeeh...nə gözəl günlər idi. Məni də ağlatdın qardaş. Eviyin 200 metrliyinə gedəsən, gedib baxa bilməyəsən. Böyük dərddir. Allah dərdimizə əlac eləsin, yenə Şuşaya doğma şəhərimizə getdiyimiz kimi Azərbaycan olaraq gedə bilək. AMİN.

Bizi telegram-da izləyin
Bizi facebook-da izləyin
Bizi tiktok-da izləyin
Bizi youtube-da izləyin





Son xəbərlər
Çox oxunanlar
Son xəbərlər