15:42 / 20 Aprel 2021

Turistlərin ən çox üz tutduğu yerlər: Orada təbiət belə oyanır - FOTOLAR

6302

Bu gün Azərbaycan əvvəlki illərdən fərqli olaraq, ekoturizmin inkişaf etməkdə olduğu ölkələrdən birinə çevrilib. Əgər çox yox, cəmi bir-iki il öncəyə qədər “hiking”, “trekking” kimi adlandırılan bu həm turizm, həm də idman növünə ancaq gənc nəsil maraq göstərirdisə, hazırda yaşlı nəslin nümayəndələri də bu sahədə fəaliyyət göstərən klublara qoşulub, təbiətə çıxırlar.

Bakupost.az xəbər verir ki, artıq ölkədə bu istiqamətdə fəaliyyət göstərən peşəkar klublar və onların daimi təbiət yürüşlərinə qoşulan heyətləri formalaşıb. Həmçinin xarici ölkələrdə olduğu kimi, Azərbaycanda da bu növ aktiv həyat sevənlərin rahatlıqla gedə biləcəyi yürüş marşrutları müəyyənləşib.

Təbii ki, ən çox gedilən marşrutlar paytaxta yaxın olan - Xızı, Quba, Qusar, İsmayıllı, Qəbələ və Lənkəran, Lerik, Astara rayonlarınadır.

Havaların isinməsi, təbiətin oyanışı ilə birlikdə, həmin klubların yürüş sayında da xeyli canlanma var. Bu günlərdə "Backcountry Azerbaijan" klubunun Hirkan Milli Parkının ən gözəl və son illərdə ekoturizm həvəskarlarının sevimlisinə çevrilmiş, Astaranın Sım kəndinə macəra yürüşü baş tutub.