Türkiyə Gültəkin Hacıbəylini niyə Bakıya göndərmir?

Bakupost.az xəbər verir ki, İstanbulda yaşayan və adının açıqlanmasını istəməyən hüquq müdafiəçisi Axar.az-a verdiyi məlumatda Arnavutköy deportasiya məntəqəsinin olduqca böyük yer olduğunu və deport edilməsi nəzərdə tutulan müxtəlif ölkələrin vətəndaşlarının ora göndərildiyini bildirib.

“Əgər şəxs deport olunmasına etiraz edirsə, ona 15 gün müddətində özünü müdafiə etmək hüququ verilir. Ehtimal ki, Gültəkin Hacıbəyli deport olunmasına etirazını bildirib və bu istiqamətdə hüquqi proseduralar işə düşüb. Onun vəkilləri 15 gün ərzində Gültəkin Hacıbəylinin niyə deport olunmaması gərəkdiyini sübut etməlidirlər”, - mənbə bildirib.

Qeyd edək ki, Gültəkin Hacıbəyli Türkiyəyə 25 sentyabrda getdiyini, 3 aylıq müddətin 25 dekabrda tamam olduğunu (Azərbaycan vətəndaşları Türkiyədə vizasız 3 aylıq qalma hüququna malikdir), eyni zamanda, 2 illik oturum iznini əsas gətirərək, deportasiya olunmasını qanunsuz saymışdı.

Miqrasiya məsələləri üzrə ekspertlər isə bildirirlər ki, Gültəkin Hacıbəyli siyasi sığınacaq üçün müraciət etmədiyindən, onun Azərbaycan hüquq-mühafizə orqanlarının sorğusuna cavab olaraq deportunda qanunsuzluq yoxdur.