ABŞ İranın üzərinə yeni tələblər qoyur?

Mövzu ilə bağlı Bakupost.az-a açıqlamasında sabiq xarici işlər naziri Tofiq Zülfüqarov bildirir ki, əslində ortalıqda əlavə tələblər məsələsi yoxdur. Onun fikrincə, bunlar sadəcə təbliğat xatirinə ortaya atılan sözlərdir:

“Hansısa razılaşmanın əldə olunacağına inanmıram. Çünki ABŞ və İranın bir-birinə qarşı irəli sürdüyü tələbləri danışıqlar yolu ilə icra etmək mümkün deyil. Bu mənada danışıqlar sadəcə təbliğat xarakteri daşıyır. Real danışıqlar yoxdur. Trampın 15 bəndlik sülh planından əlavə Tehranın üzərinə başqa tələblər qoyacaqları barədə açıqlaması da, aparılan danışıqlar kimi məhz təbliğat xatirinə deyilən sözlərdir. Bu baxımdan deyərdim ki, əslində əlavə tələblər yoxdur”.

Zülfüqarov hesab edir ki, ABŞ-ın məqsədi İranı Suriyanın səviyyəsinə endirməkdir:

“ABŞ İranın elektrik istehsal edən müəssisələrinə zərbələr endirməyi düşünür. Belədə, proses İranın mövcud infrastrukturunu dağıdıb, onu Suriyanın infrastrukturu səviyyəsinə endirməyə doğru gedir. Məqsəd budur və o da ardıcıl olaraq həyata keçirilir”.

Qeyd edək ki, ABŞ prezidenti Donald Tramp jurnalistlərə açıqlamasında 15 bəndlik sülh planından əlavə İranın üzərinə başqa tələblər qoyacaqlarını bəyan edib. Onlar bizim əksər bəndlərimizlə razılaşıblar. Onlar planla bağlı bizimlə razılaşırlar. Biz 15 bənd istədik və onlar əsasən qəbul edilib və biz daha bir neçə şey istəyəcəyik.