ABŞ Yaxın Şərqə 18 “F 35” qırıcısı göndərdi – İranla müharibə qaçılmazdır – VİDEO

Böyük Britaniyanın “RAF Lakenheath” Hərbi Hava Bazasından çıxan 18 ABŞ “F 35A Lightning II” qırıcısı dünən Yaxın Şərqə doğru hərəkət edib. Bu, son dövrlərin ən böyük yerləşdirmələrdən biri hesab olunur.

Bakupost.az “Associated Press”ə istinadən xəbər verir ki, 495-ci qırıcı eskadrilyaya məxsus qırıcılar uçuş zamanı 6 ədəd “KC 135 Stratotanker” yanacaq doldurma təyyarəsi ilə müşayiət olunub. Təyyarələr CENTCOM (ABŞ Mərkəzi Komandanlığı) məsuliyyət zonası istiqamətində hərəkət edib.

Hərbi ekspertlər bildirir ki, bu yerləşdirmənin əsas məqsədi ABŞ-ın Yaxın Şərqdə strateji mövqeyini möhkəmləndirmək və İranla artan gərginlik fonunda potensial təhlükələrə qarşı hazırlığını nümayiş etdirməkdir. “F 35” qırıcılarının burada olması həm hava üstünlüyünün təminatı, həm də diplomatik mesajdır.

Bundan əlavə, ABŞ ikinci təyyarədaşıyan zərbə qrupunu da Yaxın Şərqdə hazır vəziyyətə gətirir. Analitiklər qeyd edir ki, bu addımlar həm İranla mümkün eskalasiya riskinə qarşı cavab hazırlığıdır, həm də regiondakı hərbi balansı gücləndirməyə yönəlib.



Ekspertlərin fikrincə, “F 35”lərin yerləşdirilməsi yalnız hərbi üstünlüyün təminatı deyil, eyni zamanda ABŞ-ın diplomatik və strateji mövqeyini nümayiş etdirmək üçün bir siqnal mesajıdır. Bu addım ABŞ-ın bölgədə nüfuzunu möhkəmləndirmək, nüvə danışıqlarında strateji üstünlük əldə etmək və CENTCOM-un hərbi hazırlığını nümayiş etdirmək məqsədini güdür.

Cavid, BakuPost