Ru
14:32 / 30 Yanvar 2022

AzTV-də Rəsulzadə ilə bağlı veriliş niyə yayımlanmadı? - VİDEO

1503
Azərbaycan Xalq Cümhuriyyətinin banilərindən biri Məhəmməd Əmin Rəsulzadənin anadan olmasının 138 illiyi ilə bağlı AzTV-də nümayiş etdirilməsi nəzərdə tutulan sənədli film efirdə yayımlanmayacaq.

Bakupost.az xəbər verir ki, bu barədə layihənin müəllifi Hüseyn Cavadzadə məlumat yayıb.

O, yanvarın 22-də səhifəsində layihənin Rəsulzadəyə həsr olunmuş filminin anonsunu paylaşaraq, verilişin yanvarın 30-də yayımlanacağını deyib:

“Təqdim etməyə, şərh etməyə tərifləməyə ehtiyac yoxdur. Azərbaycanın qurucusu Rəsulzadə “Yüz ilin sirləri”ndə! Ondan ötə sevgi yalnız Azərbaycan sevgisidir. Bu gün Azərbaycanın mövcudluğu , varlığı da onun qalibiyyətidir. Doğum günü ərəfəsində Azərbaycan televiziya məkanında ilk dəfə Məhəmməd Əmindən danışacağıq”.


Bundan sonra isə yanvarın 27-də filmin yayımlanmayacağını bildirib. Qeyd edib ki, veriliş tədbirlərin birində təqdim olunacaq.

Məsələ sosial şəbəkələrdə müzakirələrə səbəb olub. Bundan sonra AzTV də bu barədə açıqlama yayıb:

“Bu gün AzTV hansısa verilişi efirə verməməkdə ittiham olunur.

Əvvəla, həmkarlarımızdan soruşmaq istərdik ki, söhbət hansı verilişdən gedir? Yaxud nəzərdə tutduqları verilişin adını çəksinlər, biz də maraqlanaq ki, həmin verilişin anonsu AzTV-nin efirində yayımlanıbmı? Efirdə deyilibmi, yaxud proqramda yazılıbmı ki, bu veriliş efirə gedəcək? Əgər yazılmayıb və deyilməyibsə, hansısa verilişin TV-də yayımlanmaması ilə bağlı ittiham irəli sürmək hansı əsasa və ya məntiqə sığır?

İkincisi, TV-də onlarla verilişlər hazırlanır, bəzən hətta anonsu verilsə də, efirə daha çox texniki səbəblərdən təqdim olunmur. Bu xəbərdirmi? Və ya bundan xəbər düzəltmək nə dərəcədə məntiqli və peşəkar yanaşmadır?

Mövzuya gəlincə, AzTV-də Azərbaycan Xalq Cümhuriyyətinin qurucuları barədə yüzlərlə material yayımlanıb və bu gün də efirə verilir. M.Ə.Rəsulzadənin nəvəsinin ilk olaraq məhz AzTV-də efirə çıxması və maraqlı açıqlamalar verməsini diqqətli tamaşaçılar, yəqin ki, unutmayıblar.

Odur ki, bu mövzuda hər hansı kampaniyaya start verilməsinin özü, düşünürük ki, ayıbdır”.
Bizi telegram-da izləyin
Bizi facebook-da izləyin
Bizi tiktok-da izləyin
Bizi youtube-da izləyin
Şərhlər
  • t.ədalət

    Azərbaycan rusiyanın pəncəsi altında olduğu üçün M.Ə.Rəsulzadə mövzusu yasaq olacaq.Bir də Əbülfəz Əliyevin qurduğu kürd dövləti üçün Rəsulzadə arzu olunmayan şəxsdir.Əbülfəz Əliyev və İsa Qənbərlərin Azərbaycan türklərinin taleyinə dığırlatdıqları daşların ağrı-acısı hələ uzun müddət bitməyəcək..

Son xəbərlər
Çox oxunanlar
Son xəbərlər