HƏMAS Siyasi Bürosunun sədri İsmayıl Haniyənin sui-qəsdi ilə bağlı Çin Xarici İşlər Nazirliyindən açıqlama yayılıb.
Bakupost.az xəbər verir ki, Əl-Cəzirə telekanalının məlumatına görə, Çin Xarici İşlər Nazirliyinin sözçüsü Lin Cien İranda HƏMAS Siyasi Bürosunun sədri İsmayıl Haniyənin öldürülməsi ilə bağlı açıqlama verib.
Lin hər cür sui-qəsd və zorakılıq aktlarına qəti şəkildə qarşı olduqlarını və qınadıqlarını bildirib.
Pekinin "bu hadisənin regional vəziyyətdə daha da qeyri-sabitliyə səbəb ola biləcəyindən dərin narahat olduğunu" ifadə edən Lin, Qəzzada ən qısa zamanda hərtərəfli və daimi atəşkəsə nail olunmasının vacibliyini vurğulayıb.
Qeyd edək ki, Haniyə İranın yeni prezidenti Məsud Pezeşkiyanın andiçmə mərasimində iştirak etmək üçün Tehranda olub.
İran İnqilab Keşikçiləri Korpusu iyulun 31-də səhər saatlarında verdiyi bəyanatda Haniyənin Tehrandakı iqamətgahına hücum edildiyini açıqlayıb.
İran və HƏMAS Hərəkatı sui-qəsddə İsraili günahlandırsa da, İsrail rəsmiləri hadisə ilə bağlı açıqlama verməkdən çəkinib.
Haniyə 6 may 2017-ci ildə HƏMAS-ın Şurası tərəfindən Xalid Məşəli əvəz edərək HƏMAS-ın Siyasi Bürosunun rəhbəri seçilib.
Elnur
BakuPost