Öykü Gürman Bakıda "Xudayar təsnifi"ni belə ifa etdi - VİDEO

Türkiyəli məşhur müğənni Öykü Gürman ötən gün Bakıda, "Sea breeze"nin səhnəsində konsert verib.

Bakupost.az xəbər verir ki, o, konsertdə "Xudayar təsnifi" başda olmaqla " Yaşa Azərbaycan", "Qal sənə qurban" mahnılarını ifa edib.

Müğənni "Xudayar təsnifi"ni oxumazdan öncə "Xudayar qardaşımıza sayğı və rəhmətlə",- deyərək şəhid Xudayar Yusifovu anıb.

O, həmçinin konsert öncəsi Bakıda evləndiyini, Azərbaycanı çox sevdiyini və özünün də azərbaycanlı olduğunu bildirib.

Konsertdən həmin anları əks etdirən görüntülər sosial şəbəkələrdə sürətlə yayılıb.

İfaçının mümkün qədər şivəsiz, eyni zamanda çətin hesab edilən musiqi nümunəmizə müraciət etməsi sosial şəbəkə istifadəçiləri tərəfindən yüksək qiymətləndirilib.

Qeyd edək ki, müğənninin Azərbaycanda işləyən türk iş adamı ilə məhz Bakıda rəsmi nigaha girməsi bir müddət əvvəl sosial şəbəkələrin gündəminə çevrilmişdi. Bundan əlavə, ifaçı 2022-ci ildə də Bakıda restoranların birində səhnə çıxışına hazırlıq zamanı "Xudayar təsnifi"ndən bir parça oxuyaraq, izləyicilərindən müsbət geridönüş almışdı.

Asena,

BakuPost