Lerikdə əmioğlular arasında qarşıdurma: Yolumu kəsir, evimə basqın edir... - VİDEO

Bakupost.az-a müraciət edən Rizvan Əliyev iddia edir ki, əmisi oğlu Vaqif Əliyev onun və ailəsinin həyatına ciddi təhlükə yaradır. O, dəfələrlə aidiyyatı orqanlara müraciət etməsinə baxmayaraq, heç bir tədbir görülmədiyini deyir.

“O, baba yurdunda qalır, mən isə öz doğma atamın evində anamla yaşayıram. Məni və ailəmi görməyə gözü yoxdur. Videoları, səs yazıları da var. Evimə basqın edib. Bu videoda görünən yol var, orada asfaltdan bizim evə dönən yol bələdiyyənin balansında olan torpaqdır. Nə mənə məxsusdur, nə də ona. Bizə köməklik edin. Biz həmin yolla unu eşşəklə, araba ilə daşıyırıq, amma o, imkan vermir. İki azyaşlı məktəblimız var, biz bu yoldan istifadə edə bilmirik. O, hücum edir, söyüş söyür”.

Rizvan Əliyev iddia edir ki, əmisi oğlu 2024-cü ilin yanvarında mərhum atasının həyətində əkdiyi, “Qırmızı Kitab”a düşmüş 35 palıd ağacını da yandırıb:

“Fövqəladə Hallar Nazirliyi və polis əməkdaşları gəldi. Bununla bağlı videolar var. Özünü maşının altına atır. Yoldan keçən sürücüləri təhqir edir”.

Şikayətçi bildirir ki, dəfələrlə məsələ ilə bağlı 102 xidmətinə müraciət edib:

İndi isə sərbəst gəzir və yenə də eyni hərəkətləri edir. Bəs niyə bunun qarşısı alınmır? Deyirlər ki, dəlidir. Əgər dəlidirsə, dövlət dəlixana tikib axı. İyunun 26-sı yenidən 102-yə zəng etdim. Onlar Lerik Rayon Polis Şöbəsinə məlumat verdilər. Lerik polisindən mənə zəng edib dedilər ki, biz nə edək, orada post quraq sizə?”

Rizvan Əliyev kəndin icra nümayəndəsi Şahverən Tağıyevə də şikayət etdiyini bildirib:

“Bizim kəndin icra nümayəndəsi Tağıyev Şahverən Gülverdi oğludur. Ona deyirəm, Şahverən müəllim, gəl köməklik et. Talış dilində deyir, orada toydur, gəlim iştirak edim? Bu icra nümayəndəsinə kim bu səlahiyyəti verib ki, vətəndaşla belə danışır?”

Rizvan Əliyev qeyd edir ki, yol məsələsi ilə bağlı 5 ildir Lerik Rayon Məhkəməsində proses gedir:

“Bu qədər şikayətə, sübuta rəğmən niyə tədbir görülmür? Bu adam niyə cəzalanmır? Burada maddi maraq olmasaydı, bu adama 2 il ev dustaqlığı verilməzdi. Bu, polisi vurub, polis maşınını sındırıb”.

Onun sözlərinə görə, hazırda iş Lerik Rayon Polis Şöbəsində təhqiqatçı əməkdaşın icraatındadır. Lakin onun ailəsinə heç bir məlumat verilmir.

"Orada döyülmə iddiası var. Ekspertizaya göndərilib. Həkim rəyindən sonra hüquqi qiymət veriləcək, ehtimal ki, məhkəməyə göndəriləcək".

Məsələ ilə bağlı kəndin icra nümayəndəsi ilə də əlaqə saxladıq. Şahverən Tağıyev Bakupost.az -a açıqlmasında bildirdi ki, əmioğlular arasında dava 40 ildir davam edir:

Mübahisələri yola görədir. İcra başçısı göstəriş verib ki, onlara kömək edin, biz də kömək edib 200 metrlik yeni yol açmışıq. Əgər davaları hələ də davam edirsə, qoy hüquq-mühafizə orqanlarına müraciət etsinlər. Hər ikisi problemli adamdır.

Biz icra nümayəndəliyi olaraq əlimizdən nə gəlirsə, etmişik. Aralarında münasibət pozulandan bəri hətta külək ordan kağız gətirib həyətə atanda belə dalaşırlar. Mən 17 ildir işləyirəm, bəlkə 10 ildir onların qapısına gedirəm. Kənddə onlardan başqa heç bir qapıya getməmişik. “Toydur, gəlim?” məsələsinə gəlincə, əgər mən ona elə bir söz demiş olsaydım, o artıq mənim səs yazımı sizə göndərmişdi".

“O torpaq örüş torpağıdır. 2 il əvvəl rayon İcra Hakimiyyətinin sərəncamı ilə, polisin, yerli icra nümayəndəliyinin, yerli bələdiyyənin iştirakı ilə ora Rizvan Əliyev üçün örüşdən ayrıca yol çəkilib. O yol boşdur, heç yer çəpərlənməyib.

İndi onların qonşu davasıdır da. Bunun bələdiyyə ilə heç bir əlaqəsi yoxdur. Bu məsələ ilə ancaq hüquq-mühafizə orqanları məşğul ola bilər. Ona ayrı yol çəkilib, akt da yazılıb. İndi həmin yolla da qonşusu qoymur onu getməyə, bələdiyyə nə etsin? Oradan maşın keçəndə əmisi oğlu ailəsi ilə birlikdə çıxır və maşını daş-qalaq edirlər. Buna görə də heç bir maşın onun həyətinə gedə bilmir”.