Sürücülərin iş rejimi niyə nəzarətsizdir? - "Bir qəzada 7 nəfəri itirmək dəhşətdir"

Qəza magistralın rayon ərazisindən keçən hissəsində qeydə alınıb. Məlumata görə, hərəkətdə olan mikroavtobus yük maşınına çırpılıb.

Azərbaycan Yerüstü Nəqliyyat Agentliyi (AYNA) mikroavtobusun sərnişin daşınması üçün rəsmi icazəsi olmadığını təsdiqləyib.

Statistik göstəricilər avtobuslarla müqayisədə “Qazel” və “Sprinter” markalı nəqliyyat vasitələrinin iştirakı ilə baş verən qəzaların daha çox olduğunu göstərir.

Bəs, belə qəzaların başlıca səbəbi sürücülərin gecə-gündüz işləyərək yuxusuz qalmasıdır, yoxsa AYNA və digər qurumlar tərəfindən nəzarət mexanizminin zəif olması?

Mövzu ilə bağlı nəqliyyat eksperti Elməddin Muradlı Bakupost.az-a açıqlamasında bildirib ki, “Qazel”, “Sprinter” və oxşar tipli mikroavtobuslar fərdi nəqliyyat vasitələri sayılır:

“Əvvəllər bu nəqliyyat vasitələri ilə sərnişindaşıma daha xaotik idi. Qanunvericilik təkmilləşəndən sonra fərqlənmə nişanı, buraxılış vərəqəsi və buraxılış kartı almaq kimi tələblər qoyuldu. Lakin bəzi bölgələrdə bu qaydalara əməl edilmir və qanunsuz fəaliyyət davam edir. Təəssüf ki, sərnişinlər də bəzən tanışlıq və ya ucuz qiymətə görə belə xidmətlərdən istifadə edirlər. Amma Baş Dövlət Yol Polisi tərəfindən yayılan açıqlamadan da gördük ki, mütləq müəyyən qaydalara əməl olunmalıdır. Bu qaydalara əsasən, sürücülərin seçimi zamanı bəzi məsələlərə diqqət yetirmək lazımdır. Ancaq bəzi insanlar bunu nəzərə almırlar. Hər kənddə, hər rayonda qanuni və ya qanunsuz nə işlə məşğul olduğu bəlli olmayan insanlar var. Tanışlıqla tapırlar, danışırlar ki, “hə, sabah bizi apar rayona”, amma maraqlanmırlar ki, o sürücü sağlamdır, yoxsa xəstə, iş və istirahət rejimi, avtomobilinin vəziyyəti necədir, texniki məsələlər qaydasındadırmı və s. Heç kim də bu, maraqlanmır. Elə hamı deyir ki, rahat olsun, bir az da ucuz olsun, məni aparsın-gətirsin. Xüsusən də biz bu problemləri yay aylarında görürük. Bu da nəticə etibarilə belə ağır faciələrə gətirib çıxarır. Bu, narahatlıq doğuran məsələdir. Ona görə vətəndaşlara tövsiyə edirik ki, bu cür hallarda diqqətli olsunlar, dövlət tərəfindən yayılan açıqlamalara biganə yanaşmasınlar. Həm özlərini, həm də digərlərini təhlükəyə atmasınlar”.

Ekspertin sözlərinə görə, sürücülər bilməlidirlər ki, sərnişindaşıma fəaliyyəti çox həssas sahədir və burada qaydalara əməl etmək vacibdir:

“Qayda pozuntusu artıq faciəyə gətirib çıxarır. Mətbuat və yol polisi tərəfindən bu məsələlərə nəzarət daha da artırılmalıdır. İndi sual ortaya çıxır ki, o boyda mikroavtobus necə çıxıb bu yola, o sürücünün istirahət və iş rejimi ilə bağlı nəzarət necə və harada aparılıb? Özü də deyirlər, sürücü xəstədir, ürəktutmasından vəfat edib. Xəstə adam sükan arxasında niyə olmalıdır? Yəni bilirsiniz, insanların özünün də məsuliyyəti olmalıdır, amma bu, bəzən arxa plana keçir və nəticə ağır olur. Bir qəzada 7 nəfəri itirmək, doğrudan da, dəhşətli və ciddi narahatlıq doğuran bir hadisədir. Belə halların təkrarlanmaması üçün mütləq nəzarət mexanizmini bir daha gözdən keçirmək lazımdır”.