Azərbaycanda yeni sığorta modeli – Ödənişlərlə bağlı şad xəbər

Bu, Prezident İlham Əliyevin təsdiq etdiyi "Maliyyə inklüzivliyinin genişləndirilməsinə dair 2027–2030-cu illər üçün Dövlət Proqramı"nda öz əksini tapıb.

Sənədə əsasən, bu çərçivədə ilkin olaraq maliyyə institutlarının modelin tətbiqinə hazırlıq səviyyəsinin qiymətləndirilməsi, sonra isə müvafiq hüquqi bazanın formalaşdırılması və son nəticədə isə sığorta şirkətlərinin azı 50 %-nin açıq sığorta modeli tətbiq etməsi planlaşdırılır.

Həmçinin 2030-cu ilə qədər mikrosığorta bazarının yaradılması və inkişaf etdirilməsi hədəflənir. İlkin olaraq mikrosığorta bazarının inkişaf potensialının qiymətləndirilməsi və stimullaşdırıcı tədbirlərin müəyyən edilməsi, eləcə də tənzimləmə və lisenziyalaşdırma üzrə tələblərin müəyyən edilməsi və mikrosığorta modelinin tətbiqinə başlanılması planlaşdırılır.

Bəs, açıq sığorta modeli nədir? Hansı yenilikləri vəd edir?

Bakupost.az xəbər verir ki, mövzu ilə bağlı Bizim.Media-ya danışan Azərbaycan Sığortaçılar Assosiasiyasının ekspert qrupunun üzvü Emil Ağabağırov Dövlət Proqramı 2027-2030-cu illəri əhatə edəcək deyib.

“Proqram üçün hazırda araşdırma aparılır, beynəlxalq təcrübə öyrənilir. Proqramın icrası istiqamətində ilk iş maliyyə institutlarının modelinin tətbiqinin qiymətləndirilməsi olacaq. Daha sonra hüquqi bazanın formalaşdırılması və son nəticədə sığorta şirkətlərinin ən azı 50 faizininin "Açıq sığorta modeli"nə keçməsi planlaşdırılır. Bununla paralel mikrosığorta bazarının inkişaf potensialının qiymətləndirilməsi və stimullaşdırılması həyata keçiriləcək.

Proqram aztəminatlı vətəndaşlar üçün yeni imkanlar açacaq.

Belə ki, aztəminatlı insanlar daha az ödəniş etməklə daha çox sığorta xidmətlərindən yararlanacaqlar. Məsələn, bu vaxtadək vətəndaş 200 manat haqq ödəməklə, 10 və yaxud 20 min manatlıq sığorta ödənişinə çıxış əldə edə bilirdisə, bundan sonra sığorta ödənişi xeyli az olacaq.

Təbii ki, az sığorta haqqı müqabilində daha az sığorta ödənişi olacaq. Misal üçün 20 manat ödəməklə vətəndaş 2 min manatlıq sığorta ödənişinə çıxış əldə edəcək.

Ümumiyyətlə Dövlət Proqramının layihəsi çox genişdir. Bu proqramın icrası sığorta bazarında böyük dəyişikliklərə yol açacaq”.