Bakı neftindən istehsal edilir: Bakıdakı zavod bağlandı, İtaliyadan alırıq

Bakupost.az xəbər verir ki, bu sözləri iqtisadçı ekspert Natiq Cəfərli bildirib.

O vurğulayıb ki, 2005-ci ildə ölkədə “Azərşin” ASC yaradılmışdı, ölkədə şin istehsal edəcəkdi:

“Uzun illərdir ki, heç bir fəaliyyəti yoxdur, indi məlumat yayıldı ki, oktyabrın 22-də tam bağlanır, ləğv edilir. Halbuki şin istehsalı üçün Azərbaycan nefti çox uyğundur, neftin emalından alınan materiallarla keyfiyyətli məhsul istehsal etmək olar.

Avtomobil həvəskarlarının çox bəyəndiyi təkər markası var – “Pirelli”, İtaliya istehsalıdır.

Azərbaycan neftindən istehsal olunur. Təkər istehsalı kompüter deyil, mikrocip deyil, qəliz texnologiya heç deyil, yaxşı, biz nə vaxta qədər İtaliyaya 1 barrel - 159 litr xam nefti 70 dollara, yəni, litrini 44 sentə satıb, sonra həmin neftdən alınan şinin birini 500-800 manata, yəni, 300-500 dollar arası alacağıq?!

Ölkədə 2005-ci ildə “Azərşin” yaradıldı, işləyə bilmədi, indi bağlanır, “Pirelli” bir qırağa, ölkədə 1,2 milyondan çox avtomobil var, deməli, təqribən, 5 mln. təkər fırlanır, özümüz üçün də şin istehsal edə bilmirik”.