Diaspor sədri Krım Platformasının IV Parlament Sammitində - FOTO

Bakupost.az xəbər verir ki, bu barədə Ukrayna Ali Məclisi sədrinin müşaviri, Dünya Azərbaycanlıları Beynəlxalq Fondunun Baş katibi, Ukrayna Azərbaycanlıları Birləşmiş Diasporunun sədri Hikmət Cavad məlumat verib.

H.Cavad bildirib ki, sammitin açılışı xüsusilə təsirli oldu, gənc ukraynalı Timur Vasilışin Ukraynanın Dövlət Himnini ifa etdi, müharibə səbəbindən evini tərk etməyə məcbur qalmış bu uşağın taleyi bizə aqressiyanın qiymətini və mübarizəmizin niyə ədalətli olduğunu xatırladır:

“Biz Ukrayna Prezidenti Volodimir Zelenskinin güclü çıxışını eşitdik. O vurğuladı ki, sülh yalnız beynəlxalq hüquqa hörmət gücdən daha üstün olduğu yerdə mümkündür. Biz həmçinin Ali Radanın sədri Ruslan Stefançukun mövqeyini dinlədik. O xatırlatdı ki, Rusiya Krımı hərbi bazaya, oğurlanmış Ukrayna taxılının daşındığı mərkəzə və ukraynalılara təzyiq göstərilən bir əraziyə çevirib. R.Stefançuk bildirdi ki, Ukrayna həmişə sülh istəyib, lakin heç vaxt öz torpağı üzərində alver etməyəcək və sərhədlərin güc yolu ilə dəyişdirilməsinə razı olmayacaq.

Sammitdə ABŞ Nümayəndələr Palatasının spikeri Mayk Conson və Avropa parlamentlərinin nümayəndələri də mühüm mesaj verdilər. Dünya Stokholmdan açıq şəkildə bird aha bəyan etdi: Ukraynanın suverenliyi və ərazi bütövlüyü prinsipləri müzakirə mövzusu ola bilməz və Ukraynaya onun maraqları hesabına “sülh” qəbul etdirmək cəhdləri qəbuledilməzdir”.

H.Cavad vurğulayıb ki, bizim xalq da ukraynalılar kimi işğalın və azadlığın dəyərini yaxşı bilir:

“Biz ağrının təcrübəsini də bölüşürük, müqavimət və öz torpaqlarına qayıdış təcrübəsini də. Buna görə də Ukraynaya dəstəyimiz yalnız mənəvi deyil, tariximizin gətirdiyi həqiqətlərə söykənir.

Bu gün söhbət təkcə Krımdan deyil, Avropanın gələcəyindən, Qara dəniz regionunun təhlükəsizliyindən və beynəlxalq hüququn taleyindən gedir. Ukrayna dünyaya ədalətli sülh formulu təklif edir - işğalın tanınması olmadan, müdafiəyə məhdudiyyət qoyulmadan, diktə edilmiş şərtlər olmadan. Yalnız belə sülh davamlı ola bilər.

Bu həlledici anda biz aqressora qarşı sanksiya təzyiqini artırmalı, Ukraynanın müdafiə imkanlarını gücləndirməli və onun Aİ və NATO yolunu dəstəkləməliyik. Biz həmişə Ukraynanın yanında olmuşuq və onun tam qələbəsinə, beynəlxalq ədalətin bərpasına qədər yanında olacağıq.

Krım - Ukraynadır!

Ukraynaya eşq olsun!

Onun müttəfiqlərinə eşq olsun!

Gələcəyini qorumaqdan çəkinməyən azad xalqlara eşq olsun!”