Əfqanıstanda sel fəlakəti – 12 nəfər öldü

Son üç gündə Əfqanıstanda müşahidə olunan qarlı yağışlar və sel nəticəsində ən az 12 nəfər həlak olub, 11 nəfər yaralanıb və çox sayda ev su altında qalıb.

Bakupost.az xarici mediaya istinadən xəbər verir ki, bu barədə Milli Fəlakət İdarəsinin sözçüsü Məhəmməd Yusuf Həmad məlumat verib. Fəlakət ölkənin müxtəlif vilayətlərini əhatə edib.

Rəsminin sözlərinə görə, 274 ev tamamilə dağılıb, 1 558 ev isə qismən su altında qalıb, həmçinin çoxlu əkin sahələri ziyan görüb. Əlverişsiz hava şəraiti ilə əlaqədar olaraq yollarda və kənd təsərrüfatı sahələrində də ciddi fəsadlar yaranıb.

Əfqanıstan uzun illərdir təbii fəlakətlərə qarşı həssas bölgədir və yağış, qar, sel və torpaq sürüşmələri ölkənin bir çox rayonlarında insan itkisinə və maddi ziyana səbəb olur. Onsuz da iqtisadi çətinliklər və humanitar ehtiyaclarla üzləşən ölkədə bu tip fəlakətlər yerli əhaliyə əlavə problemlər yaradır.

Cavid, BakuPost