Faiz dərəcəsi niyə düşmür? – Kreditlə biznes qurmaq istədinsə, batdın

Real sektorun əksər sahələrində bizneslərin xalis rentabelliyi bankların effektiv kredit faizlərindən aşağıdır. İqtisadçıların bildirdiyinə görə, Azərbaycanda real sektorun əksər sahələrində gəlirlilik 10-12 faizdən yüksək olmur.

Banklar niyə yüksək kredit faizlərindən əl çəkmir?

İqtisadçı ekspert Xalid Kərimli Bakupost.az-a bildirib ki, Azərbaycanda kreditlər üzrə faiz dərəcəsi aşağı ola bilməz:

“Çünki, Azərbaycanda pul ucuz deyil. Milli valyutamız olan manata qlobal etibarlılığı da yoxdur. Bunun üçün birinci növbədə iqtisadiyyat inkişaf etməlidir.

Vətəndaş 3-4 faizlə dollarla istiqraz alır, depozit qoyur. Lakin ölkəmizdə heç kim pulunu 3-4 faizlə başqasına borc vermir. Hamı 10-12 və daha yüksək faizlə borc verməyə çalışır”.

Ekspertin sözlərinə görə, yaranmış vəziyyət həmçinin iqtisadiyyatın strukturu, risq amillərilə də bağlıdır:

“Azərbaycanda habelə biznesin alternativ maliyyələşmə mənbələri də yoxdur. Kapital bazarı zəif inkişaf edib, iqtisadiyyatın strukturu bərbad durumdadır. Qeyri-neft ixracı yox dərəcəsindədir. Yəni iqtisadiyyatla bağlı ölkəmizdə ciddi risqlər mövcuddur. Ucuz faizlərin olması üçün kütləvi şəkildə hamı ucuz borc verməlidir ki, bu da indilikdə mümkün deyil”.