Hafiz Rüstəmin 75 illiyi qeyd olundu - VİDEO

Bakupost.az xəbər verir ki, tədbirdə müəllifin “Nə çoxmuş qaranlıq, nə azmış işıq” adlı seçmə lirik şeirlər kitabı, “Bad-i saba” (XX əsr fars poeziyası antologiyası) və “Hafiz Şirazinin qəzəlləri” (“Klassiklər” seriyasından bədii tərcümələr) oxuculara təqdim olunub. Təqdim edilən nəşrlər Hafiz Rüstəmin həm orijinal poeziyada, həm də klassik Şərq ədəbiyyatının Azərbaycan dilinə çevrilməsindəki xidmətlərini əks etdirir.

Tədbiri giriş sözü ilə Qanun Nəşrlər Evinin rəhbəri, naşir Şahbaz Xudoğlu açıb. O, çıxışında Hafiz Rüstəmin klassik Şərq poeziyasının Azərbaycan oxucusuna çatdırılmasında mühüm rol oynadığını vurğulayıb.

Ədəbi gecədə VHP sədrinin müavini, millət vəkili Fəzail İbrahimli, KXCP lideri Mirmahmud Mirəlioğlu, BSU-nun professoru Telman Vəlixanlı, tənqidçi-yazar Vaqif Yusifli, qocaman təhsil işçisi Aydın Əbilov, şairlər Ağacəfər Həsənli və İbrahim İlyaslı, ədəbiyyatşünas alim Əkrəm Bağırov, bədii qiraətçi Mehman Mayılxanlı, şərqşünas Zəki Bayram və yazıçı Zahir Məlikli çıxış edərək yubilyarın yaradıcılığı və tərcümə fəaliyyətinə dair fikirlərini bölüşüblər.

Çıxışlarda Hafiz Rüstəmin poeziyasında vicdan, zaman və insan məsuliyyəti mövzularının aparıcı xətt təşkil etdiyi, onun tərcümələrinin isə klassik Şərq poeziyasının ruhunu qorumaq baxımından xüsusi dəyərə malik olduğu vurğulanıb.

Tədbirin sonunda Hafiz Rüstəm yeni nəşr olunmuş kitablarını və digər əsərlərini tədbir iştirakçıları üçün imzalayıb.

Hafiz Rüstəm şair, şərqşünas və tərcüməçidir. O, klassik fars poeziyasının, xüsusilə Hafiz Şirazinin indiyədək Azərbaycan dilinə çevrilməmiş qəzəllərini dilimizə qazandıran əsas müəlliflərdəndir. Uzun illər ərzində həm orijinal poeziyası, həm də klassik Şərq ədəbiyyatının bədii tərcümələri ilə Azərbaycan ədəbiyyatında özünəməxsus yer tutub.