Maduro hərbi gəmiləri dənizə çıxardı – ABŞ-Venesuela müharibənin bir addımlığında

Venesuela hökuməti ABŞ-ın neft tankerlərinə qarşı siyasətinə cavab olaraq ölkənin hərbi dəniz qüvvələrini neft daşıyan gəmiləri müşayiət etmək üçün dənizə çıxarıb.

Bakupost.az “The New York Times”a istinadən xəbər verir ki, bu addım dekabrın 18-i gecəsi baş verib. Tankerlər hərbi gəmilərin qoruması altında ölkənin şərq sahillərindən çıxaraq əsasən Asiya bazarlarına üz tutub.

Bu, ABŞ Prezidenti Donald Trampın dünən Venesuelanın “tam blokada” qərarından sonra baş verir. Tramp sosial mediada paylaşdığı bəyanatda Venesuelaya daxil olan və çıxan bütün neft tankerlərinə blokada tətbiq etdiyini bildirib və yaratdığı gərginliyi əsaslandırmaq üçün Venesuelanın ABŞ-a məxsus aktivləri “ələ keçirdiyini” iddia etmişdi.

Venesuela hökuməti Trampın qərarını beynəlxalq hüququn pozulması və imperialist niyyət kimi qəti şəkildə pisləyib. Karakas bu addımı sərt qınayaraq blokadanı qeyri-qanuni və sərbəst ticarət prinsiplərinə zidd hesab edir.

Bundan əvvəl ABŞ hərbi və hüquq orqanları Venesuela sahillərində “Skipper” adlı böyük tankerini ələ keçirmişdi. Bu addım da Vaşinqton tərəfindən sanksiyaları pozduğu iddiası ilə izah olunub və bu gərginliyi daha da artırıb.

Hazırda tərəflər arasında diplomatik gərginlik yüksək səviyyədə qalır və məsələnin Birləşmiş Millətlər Təşkilatı çərçivəsində müzakirə olunması üçün addımlar atıldığı bildirilir.

Cavid, BakuPost