Pul köçürmələrində yeni qayda: 20 min manatlıq limit kimlərə tətbiq olunur?

İqtisadçı Eldəniz Əmirov “Bakupost” a bildirib ki, 20 min manat vətəndaşların və ya sahibkarların pul köçürməsinə qoyulan limit deyil. Bu məbləğ maliyyə institutlarının Maliyyə Monitorinq Xidmətinə məlumat və sənəd təqdim etməli olduğu həddi ifadə edir.

Onun sözlərinə görə, əsas dəyişiklik 20 min manatlıq həddin artıq bir təqvim ili üzrə hesablanmasıdır. Bu yanaşma il ərzində həyata keçirilən elektron köçürmələrin daha bütöv şəkildə qiymətləndirilməsinə və maliyyə əməliyyatlarının izlənməsinin sistemləşdirilməsinə imkan verəcək.

E.Əmirov qeyd edib ki, yeni qayda vəsaitlərin hərəkətinin şəffaflığının artırılmasına, şübhəli maliyyə axınlarının müəyyənləşdirilməsinə, cinayət yolu ilə əldə edilmiş vəsaitlərin leqallaşdırılması və kölgə iqtisadiyyatına qarşı mübarizənin gücləndirilməsinə xidmət edə bilər.

İqtisadçı bildirib ki, əvvəl nəzarətin ayrı-ayrı əməliyyatlar üzrə aparılması böyük həcmli vəsaitlərin çoxsaylı kiçik əməliyyatlara bölünməsi zamanı monitorinqi çətinləşdirə bilərdi. İllik yanaşma isə müştərinin əməliyyatlarının ümumi mənzərəsini görməyə imkan verəcək.

“Adi vətəndaşların gündəlik köçürmələri baxımından bunu ciddi məhdudiyyət kimi qiymətləndirmək doğru olmaz. Nə qədər insan var ki, bu məbləğdən çox vəsait köçürür?” – deyə E.Əmirov bildirib.

E.Əmirov qeyd edib ki, bank müştəridən əməliyyatın mahiyyəti, vəsaitin mənbəyi və ya təyinatı ilə bağlı əlavə sənəd tələb edə bilər. Xüsusilə il ərzində köçürmələrin həcmi artdıqda və ya əməliyyatlar müştərinin adi maliyyə profilindən fərqləndikdə belə sualların yaranması mümkündür. Lakin 20 min manat həddinin keçilməsi avtomatik olaraq hər bir müştərinin əlavə sənəd təqdim etməli olduğu anlamına gəlmir.

Sahibkarlıq subyektlərinə gəldikdə isə iqtisadçı bildirib ki, şəxsi və sahibkarlıq məqsədli maliyyə axınlarının bir-birindən ayrılması vacibdir. Davamlı kommersiya fəaliyyəti ilə məşğul olan sahibkarların təsərrüfat ödənişlərini şəxsi köçürmələr formasında həyata keçirməsi vergi intizamı baxımından suallar yarada bilər.