“Region gəncləri üçün Sosial Media Məktəbi”nə start verilib

  • 21 Okt 2019 20:59
  • 368 Baxış
“Region gəncləri üçün Sosial Media Məktəbi”nə start verilib
"Azəri Gənclər Alyansı" İctimai Birliyi “Region gəncləri üçün Sosial Media Məktəbi” mövzusunda maarifləndirici layihəyə start verib.

BakuPost-un məlumatına görə, Cəlilabad, Salyan və Lerik rayonlarında baş tutan layihənin icrasının başlıca məqsədi layihə iştirakçılarına yeni media bacarıqları, bloqqerlik, sosial media marketinqi və ondan faydalanmaq üsullarını aşılamaq və Sosial Media şəbəkələrində istifadəçilərin milli-mənəvi dəyərlərinin qorunması istiqamətində bilik və bacarıqlarının artırılmasından ibarətdir.


Layihə çərçivəsində Cəlilabad, Lerik və Salyan rayonlarında 17-19 oktyabr tarixlərində baş tutan təlimlərdə 50-dən çox 15-35 yaş arasında gənclər üçün təcrübəli ekspert və təlimçilərdən ibarət “Bloggerlik”, “Sosial Media Marketinq”, “Yeni Media” və s. kimi mövzularda interaktiv təlimlər keçirilib.


Azərbaycan Respublikası Gənclər Fondunun dəstəyilə icra olunan layihə çərçivəsində təlimlər zamanı jurnalist ekspert Seymur Verdizadə, Sosial media üzrə bloqqer Nərmin Knyazlı və təlimçi Sevda Məmmədova iştirak edib. Sosial Medianın faydaları, istifadə qaydaları və informasiya mübadiləsi, yeni medianın gücü və region gənclərinin bu proseslərdə iştirakı barədə gənc iştirakçılarla geniş fikir mübadiləsi aparılıb. Ekspert-təlimçilər çıxışları zamanı gənc iştirakçılara təlqin edirdilər ki, fəal vətəndaş olmaq və uğurlu təhsil, peşə və karyera imkanları əldə etmək və region gənclərinin şəbəkələşməsi üçün sosial mediada aktiv olmaq lazımdır.


Qeyd edək ki, gənclərin istədikləri peşəyə sahib olmaqları üçün uğurlu işlər görməyə motivasiya və gənclərlə aparılan diskussiyalardan sonra onların çoxsaylı sualları cavablandırılıb. Azəri Gənclər Alyansı İB-nin sədri Leyla Sadıqova də öz növbəsində gənclərə fəaliyyətlərində uğurlar arzulayıb, region gənclərini sosial medianın faydalarından yararlanmağa və milli-mənəvi məsələlərdə fəal iştirak etməyə dəvət edib.

Təlimlərin sonunda iştirakçılara təbliğat materialları paylanılıb və xatirə şəkli çəkilib.