Uşaqlarını diləndirən ana valideynlik hüququndan məhrum edildi

Bakupost.az Teleqraf-a istinadla xəbər verir ki, 2018 və 2019-cu il təvəllüdlü qardaşlar nənələri tərəfindən “Ümid Yeri” Xeyriyyə Cəmiyyəti İctimai Birliyinin sığınacağına yerləşdirilib. Aparılan araşdırmalar zamanı uşaqların anası A. Hümbətovanın narkotik vasitələrdən istifadə etdiyi və tüfeyli həyat tərzi sürdüyü müəyyən olunub.

Bildirilib ki, uşaqların qeyri-rəsmi atası olan şəxs də narkotik vasitələrlə bağlı ittihamla həbs edilib və hazırda cəzaçəkmə müəssisəsində saxlanılır.

Uşaqların nənəsinin ifadəsinə əsasən, ana uzun müddət nəvələri ilə maraqlanmayıb. Azyaşlılar dilənməyə məcbur edilib, onların dilənərək əldə etdikləri pullar isə ana tərəfindən narkotik vasitələrin alınmasına xərclənib.

Məlum olub ki, qardaşlar artıq iki ildir sığınacaqda qalırlar və bu müddət ərzində onlara baş çəkən olmayıb. Hazırda 6 və 7 yaşlarında olan uşaqların heç birinin rəsmi sənədləri də mövcud olmayıb.

Faktla bağlı Əmək və Əhalinin Sosial Müdafiəsi Nazirliyi məhkəməyə müraciət edərək ana A. Hümbətovanın valideynlik hüququndan məhrum edilməsini xahiş edib. Nəsimi Rayon Məhkəməsi ilkin mərhələdə iddianı təmin etməsə də, Bakı Apellyasiya Məhkəməsi qərarı dəyişib.

Apellyasiya məhkəməsinin qərarı ilə iddia təmin olunub və uşaqların anası valideynlik hüququndan məhrum edilib.