"Bu, onların mənəvi haqqıdır" - GZR-in yaradılmasına reaksiya

"Bu tarixi fakt və həqiqətdir ki, yüz illərlə Göyçə mahalında, Zəngəzurda azərbaycanlılar yaşayıb. Mədəniyyət və tariximizin çox böyük bir parçası məhz Göyçə-Zəngəzurla bağlıdır. Göyçə mahalı bizim folklorumuz, xalq yaradıcılığımızda böyük rol oynayıb. Aşıq Alı, Aşıq Ələsgərdən və onlardan əvvəl başlayaraq, orada folklor və incəsənətimizin böyük tarixi var. Bununla yanaşı, orada qədim tarixi abidələrimiz də mövcuddur. Ən başlıcası odur ki, ermənilər Göyçə mahalını sonradan Çəmbərəkənd və Basarkeçər rayonuna böldülər. Daha sonra Basarkeçərin adını dəyişib Vardenis etdilər. Göyçə mahalında 1988-ci ilə qədər soydaşlarımız yaşayıb. Göyçə-Zəngəzur o vaxt orada doğulan, indi 34 yaşında olan insanlarımızın Vətəndir. Əlbəttə, yurd, torpaq həsrəti onları zaman-zaman üzür. Ona görə də o insanların tam mənəvi haqqıdır ki, öz tarixi torpaqları ilə bağlı hər hansı bir arzu-istəyini təşkilati formada yerinə yetirsin. Bu istiqamətdə hər hansı işlərin görülməsi onların haqqıdır. Zəngəzurda Urud kimi qədim məskənlərimiz var. Bu kəndin tarixi min illəri əhatə edir. Orada böyüyən, boya-başa çatan insanlar var ki, bu gün öz yurdlarına qayıtmağı istəyirlər. Təbii ki, onlar hər hansı bir formada bu prosesi həyata keçirmək istəyirlər".