İlon Mask terror təşkilatlarından pul qazanır?

Bakupost.az xəbər verir ki, xəbər verir ki, yeni yayımlanan hesabatda "Hizbullah”, HƏMAS, Yəməndəki husilər və İraq-Suriya bölgəsində fəaliyyət göstərən bəzi militant qrupların nümayəndələrinin "X Premium” - yəni pullu abunəlik - xidmətindən istifadə etdiyi bildirilir. Məlumata görə, aylıq 8 dollar qarşılığında alınan bu xidmətlə bu hesablar "mavi işarə”yə sahib olur və paylaşdıqları məzmun daha geniş auditoriyaya çatır.

ABŞ-də xüsusilə Demokratlar Partiyasına yaxın media orqanları bu vəziyyəti sərt şəkildə tənqid edərək, İlon Maskı və X platformasını "terrorçulara meydan açmaqda” və "terrorizmi dolayı yolla dəstəkləməkdə” ittiham edir. Söhbət yalnız ABŞ tərəfindən deyil, Birləşmiş Millətlər Təşkilatı tərəfindən də terror təşkilatları kimi tanınan qruplardan gedir. Bununla belə, bəzi ölkə və cəmiyyətlər bu qrupları "müqavimət hərəkatı” və ya "azadlıq döyüşçüləri” kimi qiymətləndirirlər.

Artan ictimai təzyiqlər nəticəsində İlon Mask və X rəhbərliyi bəzi hesabları platformadan silmək məcburiyyətində qalıb. Ancaq sosial media reallıqları bu tədbirin tam təsirli olmadığını göstərib - çünki silinmiş hesablar tez-tez fərqli adlarla yenidən platformada görünməyə başlayır. ABŞ sanksiyalarının tətbiq olunduğu bu qurumlara qarşı X-in bu qədər yumşaq davranması, Vaşinqtonda siyasi böhrana səbəb olur.

Xatırlatmaq lazımdır ki, İlon Maskın şirkəti ABŞ qanunlarına və rəsmi sanksiyalara əməl etməyə məcburdur. Buna baxmayaraq, istifadəçilərin daima yeni hesablarla qayıtması bu mübarizənin asanlıqla bitməyəcəyini göstərir.

Gələcəkdə "X” platformasında kimlərin danışa biləcəyi və hansı qruplara icazə veriləcəyi mövzusu qlobal ictimaiyyətin və hüquqçuların diqqətində qalacaq. Bir tərəfdə söz azadlığı hüququ qorunmağa çalışılır, digər tərəfdə isə milli təhlükəsizlik və terrorla mübarizə məsələləri gündəmdədir.

İlon Maskın "hər kəsə açıq platforma” vizyonu praktikada dərin və mürəkkəb müzakirələrə yol açır. "X” bu ziddiyyətli dəyərlər arasında necə tarazlıq quracaq və bu qlobal narahatlıqlara necə cavab verəcək – bu suallar qarşıdakı dövrdə bütün dünyanın diqqətlə izlədiyi mövzulardan biri olmağa davam edəcək.