İran mollasını Allahdan üstün tutanlar - Düşmənçiliyin arxasında şəxsən Xamenei durur

Niyə? Axı məqsəd və niyyət ortadadır: nə qədər ki ölkənin din pərdəsi altında fars şovinizminin maraqlarına uyğun idarəçiliyi davam edəcək, İran insanına rahatçılıq yoxdur. Bu zehniyyat və bu baxışla XXI əsrdə dövlət idarə edilməz! Bu rejimin qaydaları nəinki demokratik və sivil prinsiplərə, İslamın özünə belə ziddir.

İslamın müqəddəs kitabı “Vətəni sevmək imandandır” deyir, Xamenei cəlladları Azərbaycanı vətən deyə sevənləri dar ağacından asır, zindanda çürüdür.

"Qurani Kərim" "Göylərin və yerin yaradılması dillərinizin və rənglərinizin müxtəlifliyi Onun qüdrət əlamətlərindəndir" deyir, Xamenei rejimi türklərə öz dilində danışmağı qadağan edir. Belə olan halda nəyə görə Xamenei aşiqləri, ən azından özünü təmizə çıxarmaq üçün olsa da, etiraz edib demir ki, ağa, adını islam qoyduğun nədi, islama qarşı çıxdığın nədi? Belə çıxır ki, onlar İran mollası eşqinə Allahın da sözünü qulaqardına vururlar. Axı bunlar özləri də bilirlər ki, İslamda ən vacib əməllərdən biri haqqı deməkdir.

Həqiqətin isə bir adı var: İranda Azərbaycanın əsas düşməni ayrı-ayrı məmurlar və ya diplomatik görünüşlü manqurtlar deyil - bu, bilavasitə "ali rəhbər" dediyiniz Əli Xameneidir – uzun illərdir ki, Bakıya qarşı ardıcıl şəkildə düşmənçilik və dağıdıcı siyasət quran şəxs.

Azərbaycana qarşı hər bir təxribatın, hər bir informasiya hücumunun, ölkəmizə qarşı yönəlmiş hər bir kampaniyanın arxasında məhz o dayanır. Adını "Ali dini rəhbər" qoyan şəxsin idarəçilik sistemi türkləri təhqir etməklə həm də Allahın ayələrinə qarşı üsyan etmiş olub. Allahın hökmünün pozulmasına susanlar, bu hökmü pozan sistemin başında duran adama istefa deməkdən bu qədər qəzəblənirlərsə, Xameneini Allahdan böyük görmürlərmi?

Xamenei heç vaxt Azərbaycanı sevməyib. Hətta bizim ölkənin müstəqilliyini belə rişxəndlə qarşılayıb. 1991-ci ildə Ermənistanın müstəqilliyini şanlı şəkildə təbrik edən bu zat Azərbaycanın SSRİ-dən ayrılaraq müstəqil olmasına “kiçik bir bölgənin böyüyə birləşməməsi” kimi münasibət göstərib.

Budurmu müsəlman lideri? Budurmu Hüseyn aşiqi? Dünyanın ən adil hökmdarlarından olan İmam Əlinin, Qandi kimi mübarizə adamının belə sitayiş etdiyi İmam Hüseynin, fəlsəfəsi və həyatı ilə örnək olan İmam Cəfəri Sadiqin davamçıları kimi reklam olunan bu şiəciklər məntiq və ruhani hökmlə bütün ömrünü millətinin azadlığına, xalqının xoşbəxtliyinə, insan aliliyinə həsr edən Sabir Rüstəmxanlının yanında olmalıydılar. Buna rəğmən, edam cəzasına məhkum olunan bakirə qızları ölümdən əvvəl molla rejiminin qulbeçələrinə peşkəş edən bir dini rəhbəri müdafiə etmək nə dinə, nə insanlığa, nə kişiliyə sığmaz!!!

Azərbaycanın suverenliyini hər zaman təhdid altında saxlayan və ölkəmizi İranın “ərazi parçası” kimi görən, ermənilərin Azərbaycanın işğaldan azad edilmiş ərazilərində törətdiyi vandalizmə, oradakı məscidlərin dağıdılmasına, donuz saxlanılan yerlərə çevrilməsinə səssiz qalan həmin Xameneidir!

Halbuki, ermənilər məscidləri təhqir etməklə İslam dininə görə çox böyük bir günah iş görüblər. Onların bütün bu vəhşiliklərə, İslamın təhqir olunmasına etiraz etməmələrinin əsas səbəbi farsçılıq ideologiyasına sadiq olmalarıdır. Onların nəzərində farsçılıq ideologiyası İslamdan üstündür.

Erməni xristiandır, Azərbaycan isə müsəlmandır, özü də şiədir. Amma yenə də İran dövləti erməninin tərəfindədir və bunun başında yenə həmin Xamenei durur! O Xamenei ki, Zəngəzur dəhlizi mövzusunda da Azərbaycana qarşı “Zəngəzur bizim üçün qırmızı xəttdir” deyərək, faktiki olaraq Ermənistanın maraqlarını müdafiə etmişdi. O Xamenei ki, onun rəhbəri olduğu dövlətin Ermənistana verdiyi silahlar bizim şəhidlərimizə və qazilərimizə tuşlandı. Bax, gerçəkdən Xaliq və Xalq qarşısında seçim anıdır: Bir yanda erməni ilə sarmaş-qucaq olan Xamenei, bir yanda da babalarının qəbri, övladlarının məskəni olan AZƏRBAYCAN... Vətəni kimə satırsız, ay...