"Sabitliyi pozmaq və xof yaratmaq istəyirlər" - Millət vəkili

"Fikrimcə, Fazil Mustafaya qarşı törədilən sui-qəsd çirkin bir terror aktı, Azərbaycan dövlətinə qarşı planlaşdırılan və icra olunan ağır cinayət əməlidir. Heç şübhəsiz ki, bu terror Fazil Mustafanın ictimai-siyasi fəaliyyəti ilə bağlıdır və ölkədə ictimai asayişi, sabitliyi pozmaq, xof yaratmaq, haqqı deyənləri, milli maraqları müdafiə və təbliğ edənləri qorxutmaq və susdurmaq niyyəti güdür. Fazil Mustafa tanınmış, təcrübəli, parlaq ictimai- siyasi xadim olmaqla bütün fəaliyyəti şəffafdır, şəxsi planda özünün və ailəsinin düşməni yoxdur, biznes fəaliyyəti ilə məşğul deyil, kriminal aləmlə əlaqəsi yoxdur. Deməli, atılan güllələr onun siyasi mövqeyi və fəallığından narahat və narazı olan qrupun, qüvvənin, təşkilatın, dövlətin cinayət əməlidir”.

"Görünür, diqqətin İrana yönəlməsinin səbəblərindən biri də budur. Bu gün bu terroru İran tərəfinin törətdiyini düşünənlər az deyil. Ancaq düşünürəm ki, istintaqın nəticəsi bilinmədən hansısa dövləti günahlandırmaq düzgün olmazdı. Hazırda Azərbaycan hüquq-mühafizə orqanları cinayətkarları aşkarlamaq üçün zəruri addımlar atırlar. Heç şübhəsiz ki, cinayətkarlar tapılaraq hüquqi məsuliyyətə cəlb ediləcəklər. Buna heç kimin şübhəsi olmasın. Əminəm ki, bu mənhus cinayəti sifariş verən və törədənlət qısa müddətdə tapılacaq və layiqli cəzalarını alacaqlar”.