Paytaxtın Xətai rayonu, Məhəmməd Hadi küçəsində yerləşən binanın qazanxanasında məskunlaşan və ərazini zibilliyə çevirən qadın sakinlərin etirazına səbəb olub.
"Bakupost" xəbər verir ki, Mirvari adlı qadın illərdir həmin ərazidə yaşayır. Onun burada müxtəlif tullantılar toplaması nəticəsində ərazidə ciddi antisanitar vəziyyət yaranıb.
Zaman keçdikcə tullantıların miqdarı daha da artıb və ərazi zibilliyə çevrilib. Ətrafa yayılan kəskin üfunət qoxusu və natəmizlik isə bina sakinlərinin haqlı narazılığına yol açıb.
Məlumata görə, qadına dəfələrlə alternativ yaşayış imkanları, o cümlədən sığınacaqda yerləşmək təklif edilsə də, o, bu təklifləri qəbul etməyib.
"Bakupost"un əldə etdiyi məlumata görə, sakinlərin şikayətləri əsasında yerli icra hakimiyyəti tərəfindən tədbirlər görülüb və qadın ərazidən uzaqlaşdırılıb.
Lalə Novruz, BakuPost