Bu dron o dron deyil - silah əmək alətinə çevrilirsə… - FOTO - VİDEO

Vətəndaşlarımız, imkanlı insanlar nazirliyin götürdüyü yeni istiqamətə, yeniliklərə yardım etməlidir. Əgər dəyişikliyi özümüz istəməsək, heç nə alınmayacaq.

"Sabah texnologiyada hansı inqilabi hadisə baş verəcək, bunu proqnoz etmək çətindi. Amma indi əlimizdə nə varsa, onlardan həyatımızı yüngülləşdirmək üçün yaşayış səviyyəmizi yaxşılaşdırmaq üçün istifadə etməliyik". Bu sözlər Təhsil nazirinin müavini Firudin Qurbanova məxsusdur.

Süni intellekt həyatımızın bütün sahələrini "zəbt etməyə" davam edir. 44 günlük qələbənin əsas qəhrəmanı sayılan Dronlar bu gün təhsil sahəsinə inteqrasiya olunur.

İsmayıllıya Mediatur layihəsi çərçivəsində səfərimiz zamanı Dronlardan kənd təsərrüfatı sahələrində istifadə olunması mənim üçün çox gözlənilməz oldu. Müharibə, vahimə, ölümlə assosasiya edilən Dronlar bu gün kənd təsərrüfatı sahəsində əkinçini, suçunu, aqronomu, biçinçisini əvəz edəcək.

Azərbaycan artıq silahı «əhliləşdirib» əmək alətinə çevirə bildi. Bu o deməkdir ki, ölkəmizi müharibədən çox insanların həyat şəraiti maraqlandırır. Bu fakt özü çox böyük uğurdur. 40 hektar ərazini 20 dəqiqə ərzində skan edərək torpağın tərkibini öyrənən, sonra ona lazım olan dava-dərmanla qidalandıran, lazım gələrsə əkini və biçini də həyata keçirən belə bir texnologiya artıq yeni bir dövrün başlanğıcından xəbər verir.

"Heç bir uşağı telefondan kənarda saxlamaq olmur. Hətta əlindən alsan da. Belə olan halda biz onların təhsilini telefona transfer etməliyik". Məhz bu gün texniki məktəblərdə Drondan istifadənin tədris olunması da məhz bu məqsəddən qaynaqlanır. Bunu isə təhsil sahəsində çalışan başqa bir mütəxəssis deyir.

Peşə məktəbləri kitabxanalar kimi gərək bütün rayonlarımızda olsun. Peşə bilikləri yaxşı yaşamağın qarantıdır.