Dünyada ilk virtual "nazir" işə başladı

Bakupost.az xəbər verir ki, bu barədə Albaniyanın Baş naziri Edi Rama paytaxt Tiranada Sosialist Partiyasının iclasında çıxışı əsnasında məlumat verib. O vurğulayıb ki, "Diella" (alban dilində "günəş" deməkdir) adlı yeni virtual məmur əsasən dövlət satınalmaları prosesinə cavabdeh sayılacaq.

"Diella" hökumətimizin ilk üzvüdür ki, fiziki mənada yoxdur. O, süni intellektlə (Sİ) yaradılıb. "Diella" tenderlərlə əlaqədar qərarları nazirliklərdən kənarda – tamamilə korrupsiyasız, şəffaf və rəqəmsal surətdə verəcək", – Baş nazir söyləyib.

Məlumata əsasən, alban milli geyimində avatara və gənc qadın simasına malik "Diella" ölkənin "e-Albania" rəqəmsal hökumət platformasında işləyir. Vətəndaşlar onun vasitəsilə əksər dövlət xidmətlərini onlayn rejimdə alırlar. Bildirilib ki, o, bürokratiyanın maneələrini qırmağa təkan verəcək.

Edi Rama hələ keçən ay söyləmişdi ki, ölkədə bir gün rəqəmsal nazir, hətta süni intellektlə işləyən baş nazir vəzifəyə gələ bilər. Əksəriyyət hökumət başçısının sözlərinin belə qısa müddətdə reallaşacağını gözləmirdi.