İran sərhəd boyunca hava məkanını bağladı

İran sərhəd boyunca hava məkanını bağlayıb. Bununla bağlı rəsmi “NOTAM” – yəni pilotlar üçün uçuş xəbərdarlığı yayımlanıb. Bildirişə əsasən, İranın şimal-qərb istiqamətində, Azərbaycanla sərhədə yaxın hava zonasında uçuşlara müvəqqəti məhdudiyyət tətbiq edilib.

Bakupost.az “EADaily”yə istinadən xəbər verir ki, bildirişə görə, son saatlarda bölgədə İslam İnqilabı Keşikçiləri Korpusuna (SEPAH) məxsus pilotsuz uçuş aparatlarının intensiv fəaliyyəti müşahidə olunur. Məhz bu aktivlik fonunda sərhəd boyunca hava məkanında təhlükəsizlik tədbirlərinin gücləndirildiyi qeyd edilir.

Qeyd edək ki, NOTAM beynəlxalq mülki aviasiya praktikasında geniş istifadə olunan prosedurdur və müəyyən hava sahəsində uçuşların tam, yaxud qismən məhdudlaşdırılmasını nəzərdə tutur. Bu tip qərarlar adətən təhlükəsizlik riskləri, hərbi təlimlər və ya digər operativ səbəblərlə bağlı qəbul edilir. Hazırkı halda söhbət İranın bütün hava məkanının bağlanmasından deyil, konkret olaraq sərhəd boyunca müəyyən zonada uçuşların məhdudlaşdırılmasından gedir.

Hadisə regional gərginliklə əlaqədar baş verir. Bundan bir gün əvvəl İran Xarici İşlər Nazirliyinin rəsmi nümayəndəsi İsmayıl Bəqayi bəyan etmişdi ki, ölkəsinə qarşı hətta “məhdud zərbə” belə Tehran tərəfindən aqressiya aktı kimi qiymətləndiriləcək. Bu açıqlama İranın təhlükəsizlik məsələlərinə həssas yanaşdığını və mümkün risklərə qarşı qabaqlayıcı addımlar atdığını göstərir.

Hazırda məhdudiyyətin mülki aviasiyaya konkret təsiri ilə bağlı beynəlxalq aviaşirkətlər və ya Azərbaycan tərəfindən əlavə rəsmi açıqlama verilməyib. Lakin belə hallarda uçuş marşrutları alternativ trayektoriyalar üzrə yenidən planlaşdırıla bilər.

Cavid, BakuPost