İranla müharibədə süni intellektdən istifadə olunub - İDDİA

Bakupost.az Musavat.com-a istinadla xəbər verir ki, bu barədə məlumat AFP agentliyi tərəfindən nəzərdən keçirilən ABŞ Ədliyyə Nazirliyinə məxsus məhkəmə sənədlərində var.

Məlumat, böyük bir xAI məlumat mərkəzini təchiz edən qaz turbinləri ilə bağlı məhkəmə iddiasının bir hissəsi olaraq hazırlanmış 15 iyun tarixli hökumət memorandumunda yer alır. NAACP (National Association for the Advancement of Colored People-ABŞ-də fəaliyyət göstərən vətəndaş hüquqları təşkilatı) şirkətə qarşı ekoloji iddia qaldırıb.

Sənəddə Ədliyyə Nazirliyi iddia edir ki, məlumat mərkəzinin fəaliyyətini məhdudlaşdırmağa cəhd ABŞ-nin milli, iqtisadi və enerji təhlükəsizliyinə zərər verə bilər, çünki onun gücü ABŞ Müdafiə Nazirliyinin hərbi əməliyyatlarını dəstəkləyən süni intellekt sistemlərinin hazırlanması üçün istifadə olunur.

Sübut olaraq hökumət Pentaqonda süni intellekt proqramlarının rəhbəri Kameron Stenlinin ifadəsini təqdim edib. Təqdim olunan sənədlərə görə, “Maven Smart Systems” sistemi ABŞ ordusuna “Epic Fury” əməliyyatı zamanı 96 saat ərzində 2000-dən çox sursatdan istifadə edərək 2000-dən çox müxtəlif hədəfi vurmağa imkan verib.

Bu iddia xAI şirkətini lazımi icazələr olmadan onlarla qaz turbinini idarə etməkdə və “Təmiz Hava Qanunu”nu pozmaqda ittiham edir. Təşkilat iddia edir ki, avadanlığın işləməsi əsasən afroamerikalıların yaşadığı rayonların çirklənməsinə səbəb olur. xAI cavab olaraq bildirir ki, turbinlər müvəqqəti və mobil qurğulardır, buna görə də müvafiq tənzimləyici tələblərin əhatəsinə düşmür.

İş materiallarında həmçinin qeyd olunur ki, fevralın sonunda ABŞ hökuməti “Anthropic” şirkəti ilə əməkdaşlığı dayandırıb, çünki şirkət öz modellərinin tam avtomatlaşdırılmış zərbə endirilməsi və ABŞ vətəndaşlarının kütləvi şəkildə izlənilməsi üçün istifadəsinə icazə verməkdən imtina edib.

Bundan sonra Pentaqon süni intellekt sahəsində fəaliyyət göstərən digər tərtibatçılarla, o cümlədən Google, OpenAI və xAI ilə əməkdaşlığı daha da gücləndirib.

Eyni zamanda süni intellektin hərbi sahədə tətbiqi mərhələli şəkildə davam edir. Sənədlərə əsasən, mart ayında ABŞ hakimiyyəti hələ də İrana qarşı hərbi əməliyyatlarda “Anthropic” şirkətinə məxsus “Claude” modelindən istifadə edildiyini etiraf edib.