Medalını satan qazi ilə bağlı açıqlama - "İşsiz deyil, “Azərpoçt”da çalışır"

Bu sözləri Bakupost.az -ın sorğusuna cavab olaraq Əmək və Əhalinin Sosial Müdafiəsi Nazirliyindən bildirilib.

Qeyd olunub ki, hərbi həkim komissiyasının həmin şəhadətnaməsi şəxsin xəsarət və ya xəstəliklərinin hərbi səbəblə əlaqəsini təsdiq edir:

"S.İskəndərov barəsində qeyd olunan şəhadətnamə təqdim olunduqda və e-sistemə göndəriş daxil edildikdə o, Əmək və Əhalinin Sosial Müdafiəsi Nazirliyinin tabeliyindəki Dövlət Tibbi-Sosial Ekspertiza və Reabilitasiya Agentliyi tərəfindən əyani müayinə cəlb edilərək əlilliyi qiymətləndiriləcək.

Hazırda saglamlıq durumunun fiziki baxımdan normal olduğunu bildirən S.İskəndərov yalnız psixoloji dəstəyə ehtiyacı olduğunu qeyd edib.

S.İskəndərovun istəyi daha yüksək əməkhaqqı olan işdə çalışmaq və ya özünüməşğulluq proqramına cəlb edilməkdir.

İşsiz olmadığı üçün həmin proqrama cəlb edilməsi mümkün olmasa da, S.İskəndərov gün ərzində ərazi məşğulluq mərkəzinə müraciət edəcək və yüksək əməkhaqqı olan vakansiyalarla tanış olacaq. İstəyinə və əmək bacarıqlarına uyğun olduğu halda yüksək əməkhaqqı olan işlə təmin olunacaq.

O, həssas qrupların ərzaq dəstəyi ilə təminatı proqramı ilə əhatə olunmaq üçün qeydiyyata alınıb".

Qeyd edək ki, qazi Səid İskəndərov "Xocavəndin azad olunmasına görə" aldığı medalı satışa çıxarıb. O, diqqətdən kənarda qaldığı üçün belə bir addım atdığını bildirib. Eyni zamanda psixoloq müalicəsi almaq istədiyini qeyd edib.