Nyu Yorkun meri seçilən Məmdaninin cinsi azlıqlara baxışı

Bakupost.az xəbər verir ki, politoloq Xaqani Cəfərli müsəlman bir şəxsin Nyu York meri seçilməsini fərqli yöndən qiymətləndirməyi və Zöhran Məmdaniyə “islami yanaşma” sərgiləməyi lüzumsuz hesab edib.

O bildirib ki, bu cür yanaşmalar Zöhran Məmdanini tanımamaqdan və onun karyerasına bələd olmamaqdan irəli gəlir.

“Müsəlman əsilli Zöhran Məmdaninin Nyu Yorkun meri seçilməsi bütün Türkiyə cəmiyyətində, o cümlədən Azərbaycan cəmiyyətinin bilgisiz təbəqəsində qəribə bir reaksiya doğurub. Aydın görünür ki, Zöhran Məmdanin dini kimliyinə aludə olanlar bu şəxsin fəaliyyəti ilə bağlı çox da bilgiyə sahib deyillər. Məsələn, Türkiyədəki islamçılar Məmdanin İstanbulda üç ay davam edən və Ərdoğan hakimiyyətinə qarşı dinc etirazların ən kütləvisi kimi tarixə düşən “Gəzi Parkı olayları”na dəstək verdiyindən, bu olaylar zamanı bir neçə dəfə sosial şəbəkələrdə paylaşımlar etməsindən xəbərsizdirlər.

Türkiyə və Azərbaycandakı islamçılar cinsi azlıqlara Məmdaninin münasibətini bilmirlər. Halbuki Zöhran Məmdani dəfələrlə cinsi azlıqların Nyu Yorkda keçirdikləri yürüşlərə qatılaraq, onların tələblərini dəstəkləyib”, - o vurğulayıb.