“Real Madrid”də qalmaqal – Mbappenin zədəsi səhv diaqnoz edilib

Bakupost.az İspaniya mediasına istinadən xəbər verir ki, klubun hücumçusu Kylian Mbappe zədələndikdən sonra tibbi müayinə zamanı ciddi səhvə yol verilib.

Mediada yayılan məlumatlara əsasən, futbolçunun dizində zədə olduğu halda, tibbi personal səhvən sağlam ayağı müayinə edib. Nəticədə zədə vaxtında düzgün müəyyən edilməyib və Mbappe bir neçə oyunda zədə ilə çıxış etməyə davam edib. Bu isə klub daxilində tibbi xidmətin fəaliyyəti ilə bağlı ciddi qalmaqal yaradıb.

Bildirilir ki, sonradan futbolçu əlavə müayinə üçün Fransaya gedib və orada aparılan yoxlamalar nəticəsində zədə düzgün müəyyən edilib və müalicə planı hazırlanıb. Bundan sonra futbolçunun vəziyyətinin yaxşılaşdığı qeyd olunur.

Hadisədən sonra klubun tibbi xidmətinin fəaliyyəti geniş müzakirə mövzusuna çevrilib. Hazırda tibbi heyətin tam şəkildə işdən çıxarılması barədə rəsmi açıqlama verilməsə də, məsələ klub daxilində ciddi nəzarətə götürülüb.