Rusiyanın yalvarışları başladı - SƏBƏB

Bakupost.az xəbər verir ki, bu barədə siyasi şərhçi Xəqani Cəfərli bildirib.

Onun sözlərinə görə, Peskov ABŞ və Rusiyanı nəzərdə tutaraq “tərəflər üçün çox parlaq üfüqlərin açıldığını”, mövcud vəziyyətin “vaxt itirməyə, pul itirməyə, mənfəət itirməyə” gətirib çıxardığını bildirib:

“Rusiyanın xarici işlər naziri, “kədərli at” ayamalı Sergey Lavrov özü isə “Corriere della Sera” nəşrinə müsahibəsində Budapeştdə planlaşdırılan sammitin Donald Tramp tərəfindən təxirə salınmasının səbəbini ABŞ prezidentinə verilən “məqsədyönlü hesabat”la izah etməyə çalışıb. Lavrov bu hesabatın kimin tərəfindən hazırlandığını bilmədiklərini, lakin liderlərin sammitinin məhz bu hesabata görə baş tutmadığını bəyan edib. Lavrov Rusiyanın "danışıqlara hazır olmadığı" və Alyaskada əldə edilmiş razılaşmaları "pozduğu" iddialarını rədd edərək Moskvanın danışıqlara hazır, əldə olunan anlaşmalara da sadiq olduğunu vurğulayıb.

Lavrov və Peskovun simasında “timsahın göz yaşları” tökməsi səbəbsiz deyil. “Rosneft” və “Lukoyl” neft şirkətlərinə qarşı sanksiyaların qüvvəyə minəcəyi 21 noyabra günlər qalıb. ABŞ prezidenti Donald Trampın Putinlə danışıqlardan imtina edərək “Rosneft” və “Lukoyl” neft şirkətlərinə qarşı sanksiyalar tətbiq etməsi Rusiyanın iqtisadi boğulmasını sürətləndirib. “Rosneft” və “Lukoyl”a qarşı sanksiyalardan sonra Rusiyanın beş böyük neft şirkətinin 4-ünün dünya bazarlarına çıxışı çətinləşib ki, bu da Rusiyanın əsas ticarət tərəfdaşlarını narahat edib. Rusiya neftinin əsas alıcıları Çin, Hindistan, Türkiyə, Braziliya və Macarıstan kimi ölkələr də çətinliklərlə üzləşiblər.

Macarıstanın baş naziri Viktor Orban Vaşinqtona səfər edərək Rusiya neftindən imtina üçün qısa müddət güzəşt edilməsi üçün ABŞ-dən 600 milyon dollarlıq sığılmış qaz almağa razı olub. Türkiyənin xarici işlər naziri Hakan Fidan Vaşinqtonda apardığı danışıqlarda ölkəsinə müəyyən müddət güzəşt edilməsini xahiş edib. Çin və Hindistan sürətlə Rusiya neftin imtina edərək alternativ mənbələrə üz tutmağa başlayıblar.

Rusiyanın enerji bazarlarından çıxarılıb atılmasından məharətlə istifadə edən Səudiyyə Ərəbistan taxt-tacının vəliəhdi, Məhəmməd peyğəmbərdən sonra ən ağıllı ərəb adlandırılan Məhəmməd bin Salman yaranmış vəziyyətdən maksimum istifadə etməyə çalışır. Buna görə Səudiyyə Ərəbistanın neft nəhəngi “Saudi Aramco” şirkəti Çin və Hindistana endirimli qiymətlərlə neft təklif etməyə başlayıb.

İmperiya hərisliyinə yoluxmuş Rusiya elitasından fərqli olaraq Səudiyyə Ərəbistan taxt-tacının vəliəhdi Məhəmməd bin Salman gözəl bilir ki, formalaşmaqda olan yeni dünya düzəni enerji bazarlarının dizayn edilməsindən başlayıb. Dizayn edilməkdə olan enerji bazarlarından çıxarılan ölkə edama məhkim edilmiş məhkuma bənzəyir. “Rosneft” və “Lukoyl”a qarşı sanksiyalardan sonra Moskvada bunu başa düşməyə başlayıblar. Ona görə də Rusiyanın yalvarışları başlayıb.

Kremlin təbliğat maşının narrativlərini Azərbaycan cəmiyyətinə sırımağa çalışan “politoloq” və “ekspert”lərdən fərqli olaraq Rusiyada ağlı başında olan hər kəs Ukraynaya qarşı müharibənin Rusiya üçün fəlakətə çevrildiyini bilir. Azərbaycanda olduğu kimi Türkiyədə də Kremlin təbliğat maşının narrativlərini yaymaqla məşğul olanlar Türkiyə Cümhuriyyətinin qurucusu Mustafa Kemal Atütürkün müharibə ilə bağlı dahiyənə xəbərdarlığını “unudublar”. Böyük Atatürk deyirdi ki, “bir müharibə onu başlayan ölkənin vəziyyətini hərbdən əvvəlki vəziyyəti ilə müqayisədə gücləndirmirsə, belə müharibəyə başlamaq fəlakətdir”. Ukraynaya qarşı müharibəyə başlamaqla Rusiyanın üzləşdiyi fəlakətin miqyası ilə bağlı daha ətraflı yazmağa çalışacağam”.