“Warner Bros.”a daha yüksək təklif – Kino sənayesini qarışdıran iddia gəldi

Nəhəng kino sənayesi şirkəti “Paramount” “Warner Bros. Discovery” (“WBD”) satın almaq üçün hər hissəyə 30 dollar olmaqla ümumilikdə 108,4 milyard dollarlıq təklif təqdim edib. Şirkət hesab edir ki, bu təklif həm maliyyə, həm də tənzimləyici baxımdan “Netflix”in əvvəlcədən açıqladığı satınalma razılaşmasından daha üstün variantdır.

Bakupost.az xarici mediaya istinadən xəbər verir ki, “Paramount”un təklifi “WBD”-nin bütün aktivlərini – studiyalar, “HBO”, “HBO Max”, kabel TV şəbəkələri və “Global Networks” bölməsini – tam şəkildə əhatə edir. Təklifin ümumi dəyəri “Netflix”in təklifindən 18 milyard dollar daha yüksək və nağd gəlir vəd edir.

Şirkətin mövqeyinə görə, tam nağd əməliyyat daha sürətli və problemsiz təsdiq ala bilər. “Netflix”in satınalma planı isə uzun antitrest araşdırması tələb edən, həm nağd, həm də səhm kombinasiyasından ibarət mürəkkəb struktur kimi qiymətləndirilir.

“Paramount” açıqlayıb ki, son 12 həftədə “WBD” rəhbərliyinə ardıcıl 6 müxtəlif təklif göndərsə də, şirkətdən “mənalı cavab” almayıb. Buna görə də təklif birbaşa “WBD” səhmdarlarına və idarə heyətinə yönləndirilib.

“Paramount”un İdarə Heyətinin sədri və baş icraçı direktoru Devid Ellison bildirib ki, “WBD” səhmdarları “daha yüksək dəyər və daha sürətli tamamlanma” təklif edən bu təklifi qiymətləndirmək hüququna malikdir. O deyib ki, təklifin qəbul olunması “Hollivudun daha güclü və rəqabətədavamlı struktur” qazanmasına xidmət edəcək.

“Netflix” ötən həftə WBD ilə razılığa gəldiyini açıqlamışdı. Şirkət studiyalar, HBO və HBO Max-ı da əhatə edən aktivlərin 72 milyard dollarlıq səhm dəyəri və 82,7 milyard dollarlıq ümumi müəssisə dəyəri ilə alınacağını bildirmişdi. “Netflix”in ödəmə planı hissə başına 27,75 dollar olmaqla nağd və səhm kombinasiyasından ibarət idi.

“WBD” idarə heyəti hələlik Netflix ilə əldə olunan razılaşmanı qüvvədə saxlayır. Lakin “Paramount”un yüksəldilmiş və tam nağd təklifi bazarda satınalma yarışını daha da qızışdırıb. Sənaye üzrə analitiklər böyük ehtimalla hər iki müqavilənin ABŞ və beynəlxalq antiinhisar qurumları tərəfindən ciddi şəkildə araşdırılacağını bildirirlər.

ABŞ Prezidenti Donald Tramp da “WBD”nin “Netflix”ə satılmasının əleyhinə olub. Donald Tramp bu satınalma ilə bağlı ehtiyatlı mövqe sərgiləyərək, razılaşmanın şirkətə həddindən artıq böyük bazar payı verə biləcəyini və bunun rəqabət baxımından “problem yaradacağını” bildirib. O, “Netflix” rəhbəri Ted Sarandosu yüksək qiymətləndirsə də, belə böyük media birləşməsinin tənzimləyici qurumlar tərəfindən ciddi şəkildə araşdırılmalı olduğunu vurğulayıb və hökumətin bu prosesdə diqqətli davranmasının vacibliyini qeyd edib.

Cavid, BakuPost