16 ayın minimumu – “Bitcoin” prezident seçkisindən əvvəli səviyyəyə enib

Qlobal texnologiya səhmlərində satış dalğasının dərinləşməsi və müxtəlif aktiv siniflərində riskli mövqelərin ləğv edilməsi fonunda “Bitcoin” fevralın 6-da son 16 ayın minimumuna enib və 60 min dollar səviyyəsini sınaqdan keçirib.

Dünyanın ən böyük kripto valyutası sessiyanın erkən saatlarında 60.008,52 dollara qədər gerilədikdən sonra dəyişkən ticarət şəraitində istiqamətini dəyişərək 1,64% artımla 64 min dollardan ticarət olunub.

Bu səviyyə Donald Trampın kriptovalyutaları dəstəkləmək niyyətini seçki kampaniyası zamanı açıqladığı və ABŞ prezident seçkisini qazanmasından bir ay əvvəlki dövrə – 2024-cü ilin oktyabrına – təsadüf edən vaxtdan bəri qeydə alınan ən zəif göstərici olub. “Ethereum” isə sessiya ərzində 1752 dollara enərək son 10 ayın minimumunu gördükdən sonra 2,4% artımla 1891 dollara yüksəlib.

“CoinGecko” məlumatlarına görə, qlobal kripto valyuta bazarının ümumi dəyəri oktyabrın əvvəlində qeydə alınan 4,379 trilyon dollarlıq zirvədən bu yana təxminən 2 trilyon dollar azalıb. Bu məbləğin 1 trilyon dollardan çoxu təkcə son bir ay ərzində silinib.

“Bitcoin” həftəni təxminən 16% itki ilə başa vurmağa hazırlaşdığı halda, ilin əvvəlindən bəri ümumi geriləmə 27%-ə çatıb. “Ethereum” isə həftəlik təxminən 17% azalma yolundadır və il ərzindəki itkisi 36% səviyyəsindədir.

Cavid, BakuPost