ABŞ-dən gözlənilməz addım: FES illər sonra ilk dəfə FAİZİ ARTIRDI – Qızıl və neft çökdü, “Bitcoin” ucuzlaşdı

"Bakupost" xəbər verir ki, bank 2023-cü ildən bu yana ilk dəfə faiz artımına gedərək faizini 25 bal bəndi artıraraq, 3,75– 4,00 faiz aralığına yüksəldib.

Bildirilir ki, əmək bazarındakı güclü göstəricilər, yüksələn inflyasiya gözləntiləri və FES sədri Kevin Vorşun inflyasiya ilə mübarizədə qətiyyətli mövqeyi bu faiz artımını şərtləndirən əsas amillərdən olub.

Qərar elan edildikdən sonra qlobal birjalarda və rəqəmsal aktivlər bazarında ciddi dinamika müşahidə edilib. ABŞ Senatında rəqəmsal aktivlərlə bağlı "CLARITY Act" qanun layihəsinin səsvermədən keçməməsi fonunda Bitcoin 75 min 780 dollara geriləyib, "Coinbase" birjasının səhmləri isə 10 faiz dəyər itirib. ABŞ-nin 10 illik istiqraz gəlirləri isə 5 faiz səviyyəsində dəqiqləşib.

ReAL Partiyasının sədri, iqtisadçı ekspert Natiq Cəfərli “Bakupost”a bildirib ki, əslində FES-in verdiyi qərar gözlənilən idi:

“Bu məsələ iki aya yaxındır müzakirə olunduğundan, bazar və birjalar prosesə o qədər də kəskin reaksiya verməyib. Atılan addım müvəqqəti olaraq dollar indeksinin bir qədər yüksəlməsinə səbəb olacaq”.

Ekspertin sözlərinə görə, FES bu qərarı əsasən inflyasiya ilə mübarizəni gücləndirmək məqsədilə verib:

“Müharibə və münaqişələr kontekstində enerji daşıyıcılarının qiyməti kəskin artıb. ABŞ-də əsasən də dizel yanacağı kəskin yüksəlib. İndi dizelin bir qalonu 6 dollara satılır. Bu da çox yüksək qiymətdir. Daşımalarda dizel yanacağı önəmli olduğundan bu da inflyasiyaya, ərzaq və qeyri-ərzaq məhsullarının yüksəlməsinə səbəb olur. Ona görə də FES inflyasiya ilə mübarizə çərçivəsində bu addıma gedib”.

Müsahibimiz FES-in qərarının uzun sürən təsirlərinin olacağını düşünmür:

“Çünki FES-in ardıcıl olaraq faiz artımına getməsi də şübhə altındadır. Bu da ondan irəli gəlir ki, Tramp adminstrasiyası faiz artımına qarşı çıxır. Trampın buna kəskin reaksiyası da oldu. Belədə, gələn ilin əvvəlində ABŞ-də hətta fazilərin aşağı düşməsi trendini də görə bilərik. Neft qiymətləri düşsə, inflyasiya zəifləsə, FES güman ki, yenidən faizlərin uçot dərəcəsini yenidən aşağı çəkə bilər”.