ABŞ NATO-nu tərk edə bilər? – Sabiq nazirdən açıqlama

Mövzu ilə bağlı Bakupost.az-a danışan sabiq xarici işlər naziri Tofiq Zülfüqarov bildirib ki, ABŞ-ın NATO-nu tərk edəcəyi ehtimalı real görünmür:

“ABŞ-a dəstək verilməməsi NATO-nun dağılması və ya Vaşinqtonun alyansa münasibətinin köklü şəkildə dəyişməsi anlamına gəlmir”.

Bununla belə, sabiq nazir baş verənlərin ciddi siqnal olduğunu vurğulayıb:

“NATO üzvlərinin Trampın çağırışına müsbət cavab verməməsi qurum daxilində qarşılıqlı etimadın zəiflədiyini göstərir. Bu, həm də onu sübut etdi ki, alyans üzv ölkələrin bir-birini müdafiə etmək kimi əsas funksiyasını hər zaman yerinə yetirməyə hazır deyil”.

Zülfüqarovun fikrincə, mövcud vəziyyət NATO-nun gələcək fəaliyyət modelinə də təsir edə bilər:

“Bu proseslərdən sonra NATO daha çox əməkdaşlıq platforması kimi fəaliyyət göstərmək istiqamətində dəyişə bilər”.

Qeyd edək ki, İran ətrafında yaranan gərginlik NATO daxilindəki fikir ayrılıqlarını açıq şəkildə üzə çıxarıb. ABŞ-ın xüsusilə Hörmüz boğazı ilə bağlı məsələdə dəstək çağırışına alyans üzvlərinin “yox” deməsi Vaşinqtonun NATO-ya münasibətində müəyyən soyuqluq yarada bilər.

Bu fonda bəzi dairələrdə ABŞ-ın gələcəkdə NATO-dan uzaqlaşa biləcəyi ilə bağlı ehtimallar da səsləndirilir. Lakin ekspertlər bunun daha çox siyasi ritorika və təzyiq aləti kimi qiymətləndirilməsinin daha doğru olduğunu bildirirlər.