Aktyorluğu "Ögey ana", rejissorluğu "Fəryad"la parladı - Aydın Kazımzadə

“Çox qəribədir ki, Ceyhunu məşhurlaşdıran “Ögey ana” filmi oldu. Burda rejissorun da hünəri çox böyük idi. Amma Ceyhunun istedadı da öz sözünü dedi. O, anadan aktyor doğulmuşdu. Ceyhun “Görüş” filmində balaca bir epizoda çəkildi. Orda Əliağa Ağayev yemək yeyəndə onun başına bir qapaz vurur. Əslində isə bu qapaz yox, xeyir-dua idi. Bunu Ceyhuna da demişdim. O, uşaqikən daha bir neçə filmə çəkildi. “Yenilməz batalyon”da oynadı. Bu adam sakit qala bilmirdi. “Dəli Kür” filmində də çox gözəl oynadı.

Ceyhun rejissorluğa “Mozalan” da başladı və xeyli təcrübə yığıdı. Vaqif Mustafayevin “Bəyin oğurlanması” filmi baxırsan ki, başdan-aya mozalandır. Ceyhun bir neçə film çəkdi. “İşarəni dənizdən gözləyin” filmi də onundur və inqilabı mövzudadır. Onun aktyor sənətində ulduzu “Ögey ana”, rejissorluqda isə “Fəryad” filmiylə parladı. Çox təəssüf ki, Ceyhun həyatdan erkən getdiyi üçün çəkdiyi filminə belə baxa bilmədi”.

“Deməzdim ki, Ceyhunun xidmətləri kino rəhbərlərinin nəzərindən qaçıb. Amma laqeydlik olub. Hətta bir dəfə kinostudiyanın rəhbərliyi qarşısında aktyorların mükafatlandırılması məsələsi qaldırılanda yoldaşlardan biri demişdi ki, Ceyhun kinoda nə edib ki, ona fəxri ad verilsin. Bu sözləri Ceyhuna çatdırandan sonra o insan içində küsdü, amma yenə də filmlər çəkdi. Beləliklə, Ceyhun böyük bir sənət qoydu getdi. Amma təəssüf ki, heç bir fəxri ad almadı”.

Qeyd edək ki, bu gün aktyor Ceyhun Mirzəyevin ad günüdür. O, 1946-cı il aprelin 9-da Ağdamn Abdal Gülablı kəndində anadan olub. Onun 46 illik ömrünün 35 ili kino ilə bağlı olub. “Görüş”, “Ögey ana” kimi filmlərdə hələ uşaq ikən rollara çəkilib. “Mozalan”ın bədii rəhbəri olub. Onun son filmi müharibə mövzusunda çəkilən “Fəryad” olub. C.Mirzəyev 1993-cü il martın 5-də ürəktutmasından vəfat edib.