"Bədxah qüvvələrin Azərbaycandakı cəhdləri boşa çıxacaq" - Şahbaz Musayev

Mövzu ilə bağlı “Bakupost”a AMEA-nın Nizami Gəncəvi adına Ədəbiyyat İnstitutunun baş elmi işçisi, filologiya elmləri doktoru Şahbaz Musayev bildirib ki, cəmiyyət Nazirlər Kabinetinin ümumtəhsil müəssisələrində geyimlə bağlı qərarını düzgün anlamalıdır.

O bildirib ki, bəzi insanlar qərarla tanış olmadan sosial şəbəkələrdəki qərəzli şərhlərin təsiri altında ona etiraz edirlər:

"Orta məktəblərdə vahid geyim normaları bizdən əvvəl dünyanın aparıcı ölkələrində, eləcə də dost və qonşu ölkələrdə çoxdan tətbiq olunub. Həmin ölkələrdə həm məktəblilər, həm də müəllimlər bu qərara uyğun hərəkət edirlər. Qərar verildikdən sonra müəyyən ajiotaj yarandı. Bu ajiotajı süni şəkildə yaratmağa çalışdılar. Sirr deyil ki, Azərbaycan Respublikasının son illərdə təkcə regionda deyil, bütövlükdə dünyada söz sahibi olması müəyyən dairələri ciddi şəkildə narahat edir. Onlar hər vəchlə çalışırlar ki, ölkədəki vəziyyəti qarışdırsınlar. Amma geyimlə bağlı bu qərarla heç kimin hüquqları pozulmur, heç kimin inancına qarşı çıxılmır. Əksinə, Konstitusiyamızda hər bir şəxsin dini azadlığı qorunur. Orada vicdan azadlığı ilə bağlı ayrıca maddə var. Həmin maddədə qeyd olunur ki, hər kəs dinə münasibətini müstəqil şəkildə müəyyənləşdirə bilər. Vəssalam. İnsanlar namaz da qılır, oruc da tutur, məscidlərdə ibadətlə məşğul olurlar. Heç kim onların vicdan azadlığına qarşı çıxmır. Amma məsələ burasındadır ki, biz dünyəvi dövlətik. Konstitusiyamızda da qeyd olunub ki, din dövlətdən ayrıdır. Azərbaycan Respublikasında təhsil sistemi dünyəvi xarakter daşıyır. Ona görə də anlamaq lazımdır ki, məktəbə gələn insan dünyəvi təhsil müəssisəsinə gəlir və həmin məktəbə uyğun geyinməlidir.

Bu qərarın nəyi pisdir? Şagirdlər vahid forma geyindikdə onların arasında maddi və sosial vəziyyətlə bağlı fərqlər aradan qalxır. Onlar mənəvi cəhətdən bərabərləşirlər. Bunun şagirdlər arasında çox müsbət mənəvi-psixoloji tərəfi də var.

Müəllimlərə gəlincə, söhbət təkcə hicabdan getmir.Onların geyimi ilə bağlı da müəyyən tələblər var. İdman formasında, qısa ətəkdə, həddindən artıq makiyajla sinif otağına daxil olmaq məqsədəuyğun sayılmır".

Ş.Musayev vurğulayıb ki, Nazirlər Kabinetinin geyimlə bağlı qərarını müəyyən qüvvələr qəsdən yanlış təqdim edirlər:

"Hesab edirəm ki, Azərbaycan cəmiyyəti kifayət qədər ayıqdır və rasional düşünməyi bacarır. Bütün bu məsələlər gəldi-gedərdir. O qara, bədxah qüvvələrin cəhdləri də ən yaxın zamanda boşa çıxacaq. Azərbaycanda həmişə olduğu kimi, həmrəylik qalib gələcək".