Ermənistan üçün şok terapiyası

“Əgər həmin kəndlər dinc yolla qaytarılsa bu sülhə doğru böyük irəliləyiş olacaq. Paşinyan heç olmasa kiçik də olsa bir tərəfli addım atmalıdır və bu addımı şəxsən özü yox, bütövlükdə Ermənistanla birlikdə etməlidir. Çünki, biz sülhü təkcə Paşinyanla yox, Ermənistanla gələcək üçün əldə etmək istəyirik. Ermənistan qanunvericiliyinə dəyişiklik edilməsi ilə bağlı Azərbaycanın tələbi də bu qəbildəndir. Biz görməliyik ki, Ermənistan bu prosesdən keçərək, öz qatı milliyyətçi tabularını özü sındıraraq sülh prosesinə doğru irəliləyə bilir. Bu bir növ şok terapiyası və denasifikasiyadır. Kəndlərin qaytarılmasından sonra növbəti addım Konstitusiyadan əvvəl 1992-ci il iyunun 8-də Ermənistan parlamentində qəbul edilmiş qanunun ləğv edilməsi ola bilər. O zaman qəbul edilmiş qanuna görə Ermənistan rəsmiləri Qarabağı Azərbaycanın ərazisi kimi nəzərdə tutan heç bir beynəlxalq sənədə imza ata bilməz. Başqa sözlə, Konstitusiyanın qoyaq bir qırağa Paşinyan fiziki olaraq Qarabağı Azərbaycan ərazisi kimi nəzərdə tutan hətta çərçivə sənədinə imza atmaq hüququ yoxdu. Deyək ki, Konstitusiyanın dəyişdirilməsi çətin və uzun prosesdi, axı bu qanunu ləğv etmək bir iclasın və bir neçə saatın işidir”.