Talassemiyalı uşaqlara qarşı dələduzluğa görə məhkəmədə mülki iddialar qaldırılıb

Bakupost.az APA -ya istinadla xəbər verir ki, bu gün Bakı Ağır Cinayətlər Məhkəməsində keçirilən prosesdə hakim Azad Məcidov məhkəməyə 2 mülki iddia daxil olduğunu elan edib. Məhkəməyə mülki iddia ilə müraciət edən Günay Ağayeva uşağının müalicəsi üçün xalqdan dəstək alaraq yığdığı 25 min manatı tələb edib. Digər müraciət edən Nərgiz Mahmudova isə ona dəymiş 9 min manat ziyanın ödənməsini istəyib.

Daha sonra hakim təqsirləndirilən Aynur Bayramovanın qızı Əsmər Əlizadə adından məhkəməyə ərizə daxil olduğunu elan edib. Azad Məcidov ərizə barədə bunları deyib: "Ərizədə məni tənqid etmisiz, lap yaxşı. Yazmısız ki, yuxarı dairələrə müraciət etmisiz. Bəs ərizədə niyə ananınızın tutulma səbəbini yazmamıssız?"

Daha sonra təqsirləndirilən Aynur Bayramovanın vəkili Elnur Quliyev onun ev dustaqlığına buraxılmasını istəyib. Bundan başqa, iş üzrə məhkəməyə baxılması üçün disk təqdim edib. Vəkil hakimlərdən xahiş edib ki, diski izlədikdən sonra vəsatətə baxılsın, o, vəsatətin bağılmamış saxlanmasını istəyib.

Digər təqsirləndirilən Nuridə Seyidovanın vəkili isə məhkəmədən vəsatətin təmin edilməsini xahiş edib.

Müşavirədən sonra ev dustaqlığı ilə bağlı vəsatətin təmin edilmədiyi açıqlanıb.

Vəkilin məhkəməyə təqdim etdiyi diskə isə sənədlərin tədqiqi mərhələsində baxılacağı elan edilib.

A. Bayramovanın digər vəkili məhkəmənin düzgün aparılmadığını bildirib, hakimlərə etiraz edib.

Verilən etiraz qəbul edilməyib.

Sonda iş üzrə zərərçəkmiş Aysel Abdullayeva mülki iddia ilə çıxış edib. Zərərçəkən ona dəymiş 20 min 900 manat və mənəvi ziyan kimi isə 8 min manat pulu təqsirləndirilən Aynur Bayramovadan tələb edib. Mülki iddia icraata götürülüb.

Proses mayın 29-da davam etdiriləcək.

Qeyd edək ki, talassemiya xəstələrinin valideynlərinə qarşı dələduzluq edilməsi ilə bağlı ötən ilin fevral ayında daxili işlər orqanlarına məlumat daxil olub. Məlumat əsasında cinayət işi başlanılıb. Müəyyən edilib ki, Nuridə Seyidova adlı şəxs Aysel Məmmədova adlı qadınla əlbir olaraq 36 nəfər talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 980 min manatlıq dələduzluq edib. Nuriyə Seyidova barəsində həbs qətimkan tədbiri seçilib.

Təqsirləndirilən şəxslərə qarşı Cinayət Məcəlləsinin 178.3.2-ci (dələduzluq, külli miqdarda ziyan vurmaqla) maddəsi ilə ittiham irəli sürülüb.