Azərbaycanlı sabiq çempion rinqə hazırlaşır – Musayev UFC-də ikinci döyüşünə “sarı kart”la çıxacaq

“Rizin Fighting Federation”in sabiq yüngül çəki çempionu Tofiq Musayev UFC-də ilk qələbəsini qazanmağa çalışacaq. Azərbaycanlı döyüşçü “UFC Fight Night 272” turnirində Samuel Sançes ilə üz-üzə gələcək.

Bakupost.az xəbər verir ki, qarşılaşma barədə məlumatı ilk olaraq braziliyalı MMA jurnalisti Leo Gimaraynş yayıb. Xəbər daha sonra “MMAjunkie” tərəfindən təsdiqlənib. “UFC Fight Night 272” turniri aprel 4-də Las-Veqas şəhərində yerləşən “UFC Apex” arenasında keçiriləcək. Turnirin əsas döyüşü hələlik açıqlanmayıb.

Tofiq Musayev UFC-dəki debütünü ötən ilin iyun ayında edib və bu çıxış onun üçün uğursuz alınıb. O, “UFC Baku” turnirində 165 funtluq çəki limiti üzrə keçirilən çəki-sazişli döyüşdə Miktibek Orolbaya birinci raundda təslim olaraq məğlub olub.

UFC-yə gəlməzdən əvvəl Musayev Yaponiyada ciddi uğurlara imza atmışdı. O, “Rizin”in yüngül çəki üzrə Qran-prisini dominant şəkildə qazanaraq turnirin çempionu olub və finalda Patriki Freyreni “Rizin 20” turnirində məğlub edib. Bu qələbə 2015–2019-cu illər arasında davam edən 15 döyüşlük qələbə seriyasını tamamlamışdı. Həmin dövrdən sonra Musayevin aktivində 3 qələbə və 3 məğlubiyyət var.

Rəqibi 23 yaşlı Samuel Sançes UFC-də ilk döyüşünə çıxacaq. O, 2025-ci ilin sentyabrında keçirilən “Dana White’s Contender Series” turnirində Çeysen Bleyer üzərində birinci raund nokautu ilə qalib gələrək UFC ilə müqavilə imzalayıb.

“The Prodigy” ləqəbli Sançes peşəkar karyerasında keçirdiyi 12 döyüşün 11-də qalib gəlib, bu qələbələrin 9-u nokaut və ya təslim olmaqla başa çatıb.

Cavid, BakuPost