Ermənilərə qalib gələn Ayşən milli komandadan niyə çıxarılıb? - ŞİKAYƏT

Bu iddia ilə Bakupost.az -a “Xəzri” idman klubunun direktoru, Ayşənin atası Əli Kərimov müraciət edib.

Şikayətçinin sözlərinə görə, onun rəhbərlik etdiyi klubun üzvü Ayşən 2017-ci ildən peşəkar tennislə məşğuldur və son 8 il ərzində iştirak etdiyi bütün yerli turnirlərdə birincilik qazanıb.

“Beynəlxalq turnirlərdə isə bir dəfə 1-ci, bir dəfə isə 2-ci yeri tutub”, – deyə o əlavə edib.

Valideyn bildirib ki, 2021-ci ildə Federasiya prezidenti Oktay Əsədova aid Bakı Tennis Akademiyasında məşq prosesi üçün 4 il ərzində ondan 30 min manata yaxın pul alınıb:

“Oktay Əsədovla görüşdüm. O, Ayşəni milli komandanın baş məşqçisi Yalçın Manaflıya tapşırdı. 2022-ci ilin oktyabr ayına qədər Yalçın Manaflı Ayşən Kərimli ilə məşq etdi”.

Əli Kərimov iddia edir ki, 2021-ci ildə Federasiyaya daxil olan Mehman Qocayev onun etirazına görə Ayşənin yolunu kəsib:

“O, Federasiyanın vitse-prezidenti olandan sonra məşq prosesləri düzgün getmədiyinə görə mən bir klub direktoru və valideyn kimi öz etirazımı bildirdim. Mehman Qocayev bu etiraza görə Ayşənin yolunu kəsməyə başladı. 3 ildir pespublikada rəqib tanımayan Ayşən Kərimlini milli komandadan uzaq tutub, onu onlarla beynəlxalq turnirdən məhrum edib”.

Əli Kərimov bildirib ki, Ayşən 14 yaşı olmasına baxmayaraq, 12–16 noyabr 2025-ci ildə keçirilən Respublika birinciliyində 18 yaş kateqoriyasında qalib olub:

“Əslində hər hansı bir ölkədə bu nəticə sensasiya sayılır.16 noyabr 2025-ci il tarixdə Respublika birinciliyindən sonra, 18 noyabr 2025-ci il tarixdə Bakı Tennis Akademiyasında 1 saatlıq məşq prosesinə görə şəxsən Ayşəndən 80 manat pul alınıb. 40 manat kort, 40 manat məşqçi pulu”.

Şikayətçi həmçinin Gənclər və İdman Nazirliyinin məsələyə obyektiv yanaşmadığını qeyd edib:

“2022-ci ildə Fərid Qayıbovla görüşdüm. Vaxtının az olduğuna görə 3-4 dəqiqə ərzində qısaca problemləri ona çatdırdım. O dedi ki, araşdırılacaq. Bir məsələni araşdıranda faktlarla, sübutlarla hər iki tərəf dinlənilməlidir. Nazirlik Federasiyanı dinlədi, məni isə dinləmədi".

Ə.Kərimov bildirib ki, Ayşən 2022-ci ildə Antalyada keçirilən beynəlxalq turnirdə iki erməni idmançını məğlub edib. Lakin qayıtdıqdan sonra Federasiyanın rəhbərliyi Ayşənin milli komandadan çıxarıldığını bildirib:

“Bakıya qayıdanda gözləyirdik ki, Federasiyada Ayşəni təbrik edəcəklər. Əvəzində Federasiyanın baş katibi Bağır Əsgərəlizadə və Federasiyanın o vaxtkı vitse-prezidenti Salam Əsgərəlizadə bizi qəbul edərək bildirdi ki, nazir müavini Mariana Vasilyevanın tapşırığı ilə Ayşən millidən çıxarılır. Səbəb də yaşının az olmasıdır. Halbuki 2022-ci ildə 11 yaşlı Ayşən Kərimlinin qalib gəldiyi erməni tennisçilər Ayşənlə eyni yaşda idi”.

“İndiyədək uşaqla federasiya arasında heç bir problem olmayıb. Bütün narazılıqları yaradan Əli Kərimov olub. Çünki federasiyanın fəaliyyətinə, əsasnaməsinə uyğun olmayan tələblər qoyur. Bu halda da belə problemlər ortaya çıxır. Əgər biz valideynin dediyini etsək, digər uşaqlara qarşı ayrı-seçkilik və hörmətsizlik olar. Federasiyanın fəaliyyətinə uyğun olmayan tələblər və istəklər var. Valideyn olaraq gəlib məşqçi heyətinin işinə qarışırdı və müəyyən səfərlər, yarışlarla bağlı müxtəlif iddialar irəli sürürdü ki, bu qədər pul verilməlidir və s.

“30 min pul” iddiasına gəlincə əgər əlində elə bir sübut və faktlar varsa ki, 30 min manat xərcləyib, buyursun, onları təqdim etsin. Sübutlar varsa, gətirsin qoysun, görək 30 mini nəyə xərcləyib? Bu, bizə də maraqlıdır. Amma vaxtilə Ayşən Kərimlinin bir çox beynəlxalq yarışlara getməsi, ödənişlər və s. federasiya tərəfindən qarşılanıb. Hətta yazıb ki, Türkiyədə beynəlxalq yarışda rəqibini udub. Birincisi, o beynəlxalq yarış olmayıb, Türkiyənin Antalya şəhərində keçirilən yoxlama görüşünə kampa getmişdilər. Həmin xərclər də vaxtilə federasiya tərəfindən ödənilib.

Digər bir məsələ budur ki, son olaraq federasiya tərəfindən keçirilən beynəlxalq yarışda və yerli çempionatda Ayşən Kərimli iştirak edib, bunun fotoları da var. Milli komandaya yaşı çatmamaq məsələsi doğrudur. Ayşən yalnız 16 yaşından sonra, yəni hələ 2 ildən sonra iştirak edə bilər. Yığma komandada isə bir neçə müddət valideyn problem yaratdığı üçün uşağını götürüb aparmışdı. Sonradan geri gətirdiyi dövrdə də uşağa digər uşaqlarla bərabər şərait yaradılıb. Bizim sosial mediada da iştirak etdiyi müxtəlif yarışlarda onun adına rast gələ bilərsiniz. Dəfələrlə valideyn dəvət olunub, söhbətlər aparılıb. Hətta hüquqşünas belə həmin görüşlərə dəvət edilib, müəyyən görüşlər sənədləşdirilib. Lakin heç bir nəticə olmayıb. Uşağın müəyyən yarışlarda iştirakına Federasiya yox, valideyn problem yaradıb”.