Hörmüz məsələsində kompromis ola bilər: İkinci raunddan gözləntilər

Bakupost.az xəbər verir ki, ABŞ nümayəndə heyətinə birinci raundda olduğu kimi, vitse-prezident Cey Di Vens, İran tərəfinə isə parlamentin sədri Məhəmməd Baqer Qalibafın rəhbərlik edəcəyi bildirilir.

Xatırladaq ki, ABŞ ikinci raund danışıqlara bir xeyli əvvəl razılıq versə də, İran son ana qədər bu məsələdə yekun qərar verməyə tələsmirdi. İrandan olan nümayəndələr yalnız dünən dini lider Möctab Xameneinin iştirakla bağlı razılığına ala biliblər.

ABŞ Prezidenti Donald Tramp isə jurnalistlərə Vaşinqtonla Tehran arasında sazişin artıq bu axşam imzalana biləcəyini gözlədiyini bildirib.

Politoloq İlqar Vəlizadə Bakupost.az-a bildirib ki, ikinci raund danışıqlarda Hörmüz probleminin çözülməsi ehtimalı böyükdür:

“Hörmüz boğazı ətrafındakı vəziyyət hər iki tərəfi narahat edir. Mövcud vəziyyət Amerikanın xarici imicinə də təsir edir. Bu səbəbdən yəqin ki, Hörmüz boğazında qaydalarla bağlı müəyyən razılıq əldə olunacaq. Məsələ ətrafında tərəflər sabahkı danışıqlarla müəyyən ortaq məxrəcə gələ bilərlər”.

“Tərəflər hələ də diametral olaraq bir-birinə əks mövqedədirlər. Ona görə də ikinci raundun konkret olaraq hansısa nəticələr verəcəyini indidən düşünmək çətindir. Digər tərəfdən, mövqelərdəki kəskin fərqlərə baxmayaraq, tərəflər dialoqdan da qaçmırlar. Bu da onu göstərir ki, danışıqlarda nəticə ilə bağlı müəyyən potensial var. Uran, İranın nüvə proqramı və balistik raketlərlə bağlı məsələlərdə isə irəliləyiş gözlənilmir”.

“Bunu hər iki tərəf başa düşür. Ona görə də danışıqların növbəti raunduna razılıq veriblər. Hər iki tərəf başa düşür ki, yalnız müharibəyə “stavka” etmək çətin olacaq”.