Məhərrəm ayı 30 gündür: Çaşqınlıq yaradan səbəb...

Belə ki, bu il ölkəmizdə Məhərrəm ayı iyunun 16-da başlayacaq. Ayın ən mühüm günü sayılan Aşura isə iyunun 25-nə təsadüf edir. Məhərrəm ayı iyulun 15-də başa çatacaq. Bu Qafqaz Müsəlmanları İdarəsinin (QMİ) rəsmi saytında yer alan təqvimlərdə öz əksini tapıb.

Bakupost.az Ölkə.az-a istinadən xəbər verir ki, bir çox insanlar Məhərrəm ayının 40, hətta 60 gün davam etdiyini düşünür. Halbuki Məhərrəm ayı hicri-qəməri təqvimin ilk ayıdır və cəmi 29–30 gün davam edir. Tarixlər ayın görünməsindən asılı olaraq bir gün fərqlənə bilər.

Çaşqınlıq isə Məhərrəm və ondan sonrakı Səfər aylarının birlikdə qəbul edilməsindən yaranır. Azərbaycanda ənənəvi olaraq bu iki ay ərzində toy və digər şənliklər keçirilmir. Bu səbəbdən də insanlar bəzən bu dövrü vahid müddət kimi qəbul edir.

QMİ-nin təqviminə əsasən, bu il Səfər ayı iyulun 15-də başlayacaq və avqustun 13-də başa çatacaq. Beləliklə, Məhərrəm və Səfər ayları birlikdə təxminən iki ay davam edir.

Beləliklə, yayılan məlumatlarda hər hansı səhv yoxdur. Sadəcə olaraq, dini təqvimlə bağlı ənənəvi yanaşma bəzi yanlış anlaşılmalara səbəb olur.