Orban getdi: Macarıstan türk dünyası ilə necə davranacaq?

Macarıstanda ötən bazar günü baş verən seçkinin nəticələri birmənalı şəkildə göstərir ki, bu ölkə öz xarici siyasətində əsaslı dəyişikliklərə gedəcək. Seçkilərin qalibi Peter Madyar Ukraynanın haqq işini dəstəklədiyini bəyan edib. Həmçinin, bildirib ki, Orbandan fərqli olaraq, Avropa Birliyinin (AB) Kiyevə yardımla bağlı dəstəyinə əngəl olmayacaq.

Qeyd edək ki, Macarıstan Orban iqtidarı dövründə türkdilli dövlətlərlə də sıx əlaqələrə malik idi. Budapeşt Türkdilli Dövlətlər Təşkilatında (TDT) müşahidəçi statusu ilə təmsil olunurdu. Orban özü dəfələrlə türkdilli dövlətlərə səfərlər edib. Budapeştlə Bakı arasında münasibətlər də daim inkişaf edirdi. Azərbaycan Macarıstanın enerjiyə olan tələbatının ödənilməsində əsas tərəfdaşlardan biri idi.

Siyasi şərhçi Aydın Quliyev Bakupost.az-a bildirib ki, mövcud vəziyyətdə Macarıstanın xarici siyasətinin bütün əsas istiqamətlərində keyfiyyətcə yeni dəyişikliklər baş verəcək:

“Macarıstanda Orban hakimiyyətinin yürütdüyü xarici siyasət nəticəsində onun dostları ilə bərabər, saysız-hesabsız rəqib və düşmənləri də meydana çıxmışdı. Orbanla bağlı olaraq sonuncu seçkidə çoxsaylı böyük qüvvələr də fəaliyyətə keçmişdi. ABŞ, Rusiya, Slovakiya, Belarus açıq şəkildə Orbanın hakimiyyətdə qalmasına çalışırdı. Avropa Birliyi isə onun məğlubiyyətində maraqlı idi və sonda onlar buna nail oldular. Bu da onu göstərir ki, Orban hakimiyyətinin dəyişdirilməsinin arxasında ölkənin xarici siyasət kursunun dəyişdirilməsi planı dayanırdı”.

“Həmin dəyişikliyin hansı səviyyədə özünü göstərəcəyi isə gələcəyin işidir. Hər halda böyük ehtimalla Budapeşt həm TDT, həm də AB ilə münasibətlərində əsaslı dəyişikliklər edəcək”.

“Yeni hakimiyyət öz siyasətini Brüssellə razılaşdırmış olsa belə, yenə də Azərbaycana münasibəti pisləşməyəcək. Çünki rəsmi Brüsselin özü belə Bakı ilə yaxşı münasibətlərdədir. Oynadığı mühüm enerji roluna görə Azərbaycan AB-nin nəzərində mühüm statusa malikdir. Belə şəraitdə Macarıstanda hakimiyyət dəyişikliyi olsa da, bu ölkənin Bakıya münasibəti olduğu kimi qalacaq. Macarıstan özü Azərbaycanla əməkdaşlıqdan fayda götürür. Azərbaycandan neft və qaz alır. Yeni Macarıstan hakimiyyəti də Azərbaycanla münasibətlərdə əvvəlki faydalı kursu davam etdirsə, nəticələri daha böyük olacaq”.