Paşinyandan mesaj: “29 min kv.km-dən kənara çıxsaq..."

Bakupost.az xəbər verir ki, baş nazir bəzi siyasi qüvvələrin Ermənistanın yalnız beynəlxalq səviyyədə tanınmış 29 743 kvadrat kilometrlik ərazisi ilə məhdudlaşmamalı olduğunu iddia etdiyini və bu yanaşmanın açıq şəkildə təbliğatını apardıqlarını bildirib.

Paşinyanın sözlərinə görə, bu cür iddiaların davam etdirilməsi ölkəni qaçılmaz şəkildə yeni müharibəyə sürükləyə bilər. O vurğulayıb ki, Qarabağ və ətraf bölgələri əhatə edən xəritələrin və simvolların gündəmə gətirilməsi də eyni təhlükəli məntiqin tərkib hissəsidir.

Baş nazir qeyd edib ki, Ermənistan bu cür siyasətin ağır nəticələrini artıq tarixində yaşayıb və eyni səhvlərin təkrarlanması faciə ilə nəticələnə bilər.

Sonda Paşinyan cəmiyyəti və siyasi qüvvələri məsuliyyətli davranmağa çağıraraq bildirib ki, regionda sülhün qorunması üçün beynəlxalq hüquqa əsaslanan yanaşma yeganə çıxış yoludur.