Mehdiyevi tərifləyənləri istintaqa çağırmaq lazımdı - YAP-çı baş redaktordan ifşaedici ittihamlar

Bakupost.az xəbər verir ki, bu fikirləri "Yeni Azərbaycan" qəzetinin baş redaktoru Alqış Musayev bildirib.

O qeyd edib ki, Mehdiyev haqqında tərif deyənləri linç etməyin tərəfdarı deyil:

“Amma hər şeyin bir həddi var axı...Mehdiyev haqında təbrik videoları yayılır. Baxıram, sanki danışmırlar, doğurlar. Gücənirlər ki, nəsə fövqəladə bir ifadə tapıb Mehdiyevin şəninə yaraşdırsınlar. Özü də danışanlar sıradan biriləri deyil. Kifayət qədər ciddi status sahibləridirlər. Mehdiyevə "siyasətin akademiki" deyirlər. Mehdiyevə "siyasətin akademiki" deyənlər bəs Heydər Əliyevin Azərbaycan tarixindəki və siyasətindəki yerini harda görürlər? Mehdiyevi "dərin dövlət" adamı adlandırırlar. Bu birbaşa istintaq üçün əvəzsiz materialdır: dərin dövlət paralel idarəçilik deməkdir. Onda adamdan soruşarlar ki, buyur, gəl, danış, paralel strukturlar, dərinlik barədə nə bilirsən? Əcaib, həm də qorxulu bir mənzərə yaranır. Axı bu adamlar guya bizim elitamızı təmsil edirlər. Mənim heç şübhəm qalmayıb ki, Mehdiyev fərqli bir dinin daşıyıcısı olsaydı, bu adamlar ona xoş gəlsin deyə dini inanclarını da dəyişərdilər....”.