TikTok problemləri həll etdi – İstifadəçilər senzura səbəbindən sosial şəbəkəni tərk edir

TikTok ABŞ-də sahibkarları tərəfindən alınandan sonra ötən həftə yaşanan texniki nasazlıqlar və xidmət kəsintilərindən sonra normal vəziyyətə qayıtdığını bildirdi.

Bakupost.az “Engadget” texnologiya portalına istinadən xəbər verir ki, problemlər “Oracle”, “Silver Lake” və MGX kimi investorlara məxsus TikTok-un ABŞ əməliyyatlarını idarə edən data mərkəzlərindən birinin fırtına səbəbindən bağlanması ilə başlayıb.

Xüsusilə yanvar 26-da TikTok əsas infrastruktur problemi ilə üzləşdiyini və videoların bloklanması, zaman xətaları, qazancın itmiş kimi görünməsi kimi hallar barədə xəbərdarlıq etmişdi. Şirkət növbəti gün açıqlama verərək problemlərin bir hissəsinin həll edildiyini, lakin bəzi xətaların hələ də davam etdiyini bildirərək, “Yaradıcılar videolarında müvəqqəti olaraq 0 baxış və bəyənmə görə bilərlər, qazanc məlumatlarınız itmiş kimi görünə bilər. Bu server zaman xətalarından qaynaqlanan ekran səhvidir. Əsl məlumatlarınız və istifadəçi fəaliyyəti təhlükəsizdir”, – açıqlamasını vermişdi.

Bu gün sosial şəbəkənin ABŞ istifadəçilərinə yenilənmə verərək problemlərin həll olunduğunu və xidmətlə bağlı əlavə çətinliklərin gözlənilmədiyini açıqladı: “ABŞ icmamızın yaşadığı çətinliklər üçün üzr istəyirik. TikTok-un sizin üçün vacib olanı yaratmaq, kəşf etmək və əlaqə qurmaq üçün necə əhəmiyyətli olduğunu qiymətləndiririk. Səbriniz və anlayışınız üçün təşəkkür edirik.”

Eyni zamanda bəzi ABŞ istifadəçiləri yeni sahiblik və texniki problemlər səbəbi ilə TikTok-u silib. İstifadəçilərin bir qismi platformanın nəyi paylaşa biləcəklərini və digər istifadəçilərin nə görəcəyini senzura etdiyi iddialarını irəli sürüb. Məsələn, “The Guardian” qeyd edir ki, bir çox istifadəçi Aleks Prettinin öldürülməsi və ICE agentlərinə qarşı ümumi mövzulu videoları paylaşmaqda çətinlik yaşayıb.

Analitik firma “Sensor Tower”in məlumatına görə, TikTok-un ABŞ əməliyyatlarının yeni sahiblərə keçdiyi 5 günlük dövrdə tətbiqin silinmə sayı əvvəlki üç ay ilə müqayisədə 150%-dən çox artıb. Eyni zamanda, müstəqil tətbiq və rəqib platforma “UpScrolled”un yükləmələrində artım müşahidə olunub.

Mehin, BakuPost